شرم الشیخ :غزہ مذاکرات کرنے والے قطری شاہی عملے کی گاڑی کو حادثہ، 3 جاں بحق

شرم الشیخ: مصر کے سیاحتی شہر شرم الشیخ میںاسرائیل اور حماس کے درمیان غزہ امن مذاکرات کرنے والےقطر ی شاہی عملے کی گاڑی کو حادثہ پیش آیا ہے جس میں تین افراد جاں بحق ہوگئے ہیں۔

غیر ملکی میڈیا کے مطابق، قطری سفارت خانے نے تصدیق کی ہے کہ قطری شاہی عملے کی گاڑی ایک حادثے کا شکار ہوئی، جس میں تینوں ملازمین موقع پر دم توڑ گئے۔

رپورٹس کے مطابق ابتدائی طور پر سیکیورٹی ذرائع نے یہ اطلاع دی تھی کہ حادثے میں تین قطری سفارت کار جاںبحق ہوئے، تاہم بعد میں قطر کے سفارت خانے نے وضاحت کی کہ جاں بحق افراد سفارتی عملے کے ملازمین تھے، سفارت کار نہیں۔

ذرائع کا کہنا ہے، قطری عملہ غزہ جنگ بندی معاہدے سے متعلق ہونے والے مذاکرات میں شرکت کے بعد مصر میں موجود تھا۔ 

خیال رہے کہ یہ واقعہ ایسے وقت میں پیش آیا ہے جب شرم الشیخ میں جنگ بندی پر بین الاقوامی کانفرنس پیر کے روز منعقد ہونے جا رہی ہے، جس میں امریکی صدر ڈونلڈ ٹرمپ سمیت کئی عالمی رہنما شرکت کریں گے۔

قطری امیری دیوان حکومت کا سب سے اہم ادارہ سمجھا جاتا ہے، اور اس حادثے میں اہلکاروں کی ہلاکت نہ صرف قطر بلکہ خطے کے سفارتی حلقوں کے لیے ایک بڑا صدمہ قرار دیا جا رہا ہے۔