ملالہ یوسفزئی کا انکشاف: ویڈ نشے کے استعمال سے طالبان حملہ یاد آگیا

نوبیل انعام یافتہ پاکستانی سماجی کارکن ملالہ یوسفزئی نے انکشاف کیا ہے کہ آکسفورڈ یونیورسٹی کے زمانے میں دوستوں کے ساتھ ویڈ (Cannabis) کے استعمال کے بعد انہیں طالبان حملے کے مناظر یاد آگئے تھے، اور ایسا محسوس ہوا جیسے وہ دوبارہ سوات لوٹ گئی ہوں۔

برطانوی اخبار کو دیے گئے ایک انٹرویو میں ملالہ نے کہا کہ آکسفورڈ یونیورسٹی میں دوستوں کے ساتھ ویڈ پینے کے دوران اچانک ایسا لگا جیسے وہ دوبارہ 15 سال کی ہوگئی ہوں۔ ان کے مطابق، "مجھے لگا سب کچھ بھول چکی ہوں، مگر اس لمحے سب یاد آگیا — اسکول بس، مسلح شخص، گولیاں، اور ہر طرف خون۔"

ملالہ نے بتایا کہ انہیں اچانک گھبراہٹ کا شدید دورہ پڑا، جس کے بعد دوست انہیں ایک کمرے میں لے گئے۔ انہوں نے کہا، "میں نے الٹیاں کیں، طبیعت انتہائی خراب ہو گئی۔ میری دوست انیسہ نے اسپتال جانے سے روکا کیونکہ خون میں ابھی نشے کے اثرات موجود تھے۔"

انہوں نے مزید کہا کہ اس واقعے کے بعد وہ پوری رات سو نہیں سکیں۔
"میں خوفزدہ تھی کہ اگر سو گئی تو شاید دوبارہ جاگ نہ سکوں۔"

یہ انٹرویو ملالہ کی زندگی کے ذاتی اور نفسیاتی پہلوؤں پر روشنی ڈالتا ہے، جہاں انہوں نے اپنے ماضی کے صدمے، ذہنی اثرات اور بحالی کے سفر کے بارے میں کھل کر گفتگو کی۔