بلاول بھٹو زرداری کی وزیراعظم شہباز شریف سے اہم ملاقات، سیاسی کشیدگی پر بات چیت

پاکستان پیپلز پارٹی کے چیئرمین بلاول بھٹو زرداری وزیراعظم شہباز شریف سے ملاقات کے لیے وزیراعظم ہاؤس پہنچ گئے۔ بلاول بھٹو کی سربراہی میں پیپلز پارٹی کا اعلیٰ سطحی وفد وزیر اعظم سے ملاقات کر رہا ہے۔

ذرائع کے مطابق، مسلم لیگ (ن) اور پیپلز پارٹی کے وفود کے درمیان ملاقات جاری ہے جس میں مختلف امور پر گفتگو کی جا رہی ہے۔ ملاقات میں نائب وزیراعظم اور وزیر خارجہ اسحاق ڈار، رانا ثناء اللہ، ملک احمد خان اور احد چیمہ شریک ہیں، جب کہ پیپلز پارٹی کی جانب سے شیری رحمٰن، سابق وزیراعظم راجہ پرویز اشرف اور ندیم افضل چن شامل ہیں۔

ذرائع کا کہنا ہے کہ ملاقات میں خاص طور پر پنجاب حکومت کی جانب سے پیپلز پارٹی پر کیے جانے والے بیانات، اور اس کے باعث پیدا ہونے والی سیاسی کشیدگی پر گفتگو کی جا رہی ہے۔

اس ملاقات سے قبل، صدر مملکت آصف علی زرداری نے وفاقی وزیر داخلہ محسن نقوی کو کراچی بلا کر ہدایت دی تھی کہ وہ سندھ اور پنجاب حکومت کے درمیان جاری کشیدگی کم کرنے میں کردار ادا کریں۔

نوابشاہ میں 9 اکتوبر کو صدر آصف زرداری اور مسلم لیگ (ن) کے رہنماؤں کے درمیان ملاقات میں دونوں جماعتوں کے درمیان بیان بازی بند کرنے پر اصولی اتفاق بھی ہو چکا ہے۔

یاد رہے کہ پیپلز پارٹی اور مسلم لیگ (ن) کے درمیان تعلقات اس وقت تناؤ کا شکار ہو گئے تھے جب بلاول بھٹو اور دیگر پی پی رہنماؤں نے سیلاب زدگان کے لیے بین الاقوامی امداد کی اپیل اور بینظیر انکم سپورٹ پروگرام کے استعمال پر زور دیا تھا۔

اس پر سندھ کے وزیر شرجیل میمن نے الزام لگایا تھا کہ پنجاب حکومت، پیپلز پارٹی کو ہدف بنا کر درپردہ وزیر اعظم پر تنقید کر رہی ہے تاکہ ایسا تاثر دیا جا سکے کہ پیپلز پارٹی حکومت کی حمایت سے دستبردار ہو جائے۔