ایلون مسک نے ویکی پیڈیا کے مقابلے میں نیا سرچ انجن لانچ کر دیا

کیلی فورنیا: امریکی بزنس ٹائیکون اور ٹیسلہ کے بانی ایلون مسک نے “گروکی پیڈیا “(Grokipedia) کے نام سے نیا آن لائن انسائیکلوپیڈیا متعارف کروا دیا ہے، جسے انہوں نے ویکی پیڈیا کا متبادل قرار دیا ہے۔

غیر ملکی میڈیا رپورٹس کے مطابق ایلون مسک نے کہا کہ گروکی پیڈیا کا مقصد ہے “سچ، صرف سچ اور مکمل سچ” اور یہ پلیٹ فارم تعصب سے پاک معلومات فراہم کرے گا،نئے اینسائیکلو پیڈیا کی لانچنگ کے کچھ ہی دیر بعد ویکی پیڈیا پر اس کے بارے میں ایک تفصیلی مضمون چھپ چکا تھا۔ اس مضمون میں گروکی پیڈیا کے بارے میں تمام ضروری معلومات دستیاب ہیں۔

لانچ کے وقت گروکی پیڈیا کے ورژن 0.1 میں 885,000 سے زائد مضامین موجود تھے، جبکہ ویکی پیڈیا پر صرف انگریزی میں 7 ملین سے زیادہ آرٹیکلز ہیں۔

ایلون مسک نے کہا کہ آئندہ آنے والا ورژن 1.0 “موجودہ سے دس گنا بہتر” ہوگا۔ ان کا کہنا تھا کہ لانچ میں تاخیر اس لیے کی گئی تاکہ پلیٹ فارم سے “پروپیگنڈا ختم کیا جا سکے”۔

خیال رہے کہ ایلون مسک ماضی میں ویکی پیڈیا پر ’ نظریاتی طور پر بائیں بازو کے زیرِ اثر‘ ہونیکا الزام عائد کر چکے ہیں۔ 2024 میں انہوں نے ویکی پیڈیا کو “لیفٹ ایکٹیوسٹس کے کنٹرول میں” قرار دیا تھا اور لوگوں سے اس کے لیے عطیات بند کرنے کی اپیل کی تھی۔