الیکشن ٹربیونل نے مریم نواز کی کامیابی کے  خلاف انتخابی عذرداری کو مسترد کردیا

الیکشن ٹربیونل نے وزیراعلیٰ پنجاب مریم نواز کی کامیابی کے  خلاف انتخابی عذرداری کو مسترد کردیا۔

الیکشن ٹربیونل لاہور کے جج رانا زاہد محمود نے پی پی 159سے مہر شرافت کی انتخابی عذرداری پر فیصلہ سنا دیا جس میں ٹربیونل نے مریم نواز کی کامیابی کے خلاف دائر عذرداری کو مستردکردیا۔

الیکشن ٹربیونل کے مطابق عذرداری میں الیکشن ایکٹ2017 کے رول 144 کوپورا نہیں کیا گیا اور انتخابی عذرداری کے ہر صفحے پر دستخط موجود نہیں ہیں۔ بیان حلفی میں اوتھ کمشنرکی تصدیق والے صفحے پر نام اور والد کا نام نہیں لہٰذا انتخابی عذرداری کو باقاعدہ ٹرائل کے لیے پیش نہیں کیا جاسکتا۔

واضح رہے کہ پاکستان تحریک انصاف کے مہر شرافت علی نے مریم نواز کی کامیابی کو چیلنج کیا تھا۔