حکومتی سرپرستی نہ ملی تو بچی کچھی فلم انڈسٹری نہیں رہے گی، عرفان کھوسٹ کی جی این این نیوز سے گفتگو

لاہور: پاکستان فلم انڈسٹری کے مایہ ناز اور لیجنڈ اداکار عرفان کھوسٹ نے کہا ہے کہ اگر حکومتی سرپرستی نہ ملی تو بچی کچھی فلم انڈسٹری نہیں بچے گی۔

تفصیلات کے مطابق لاہور میں اپنی رہائش گاہ پر جی این این نیوز سے گفتگو کرتے ہوئے اداکار عرفان کھوسٹ نے کہا کہ فلم انڈسٹری کی تباہی کے سب ذمہ دار ہیں کسی ایک شخص کو مورد الزام ٹھہرانا درست نہیں۔ لیکن اب وقت ہے اسے بچانے کا کیونکہ یہ انڈسٹری ہمارا گھر ہے،،

خصوصی گفتگو میں لیجنڈ اداکار عرفان کھوسٹ نے کہا ہے کہ فلم انڈسٹری کے مستقبل سے مایوس نہیں لیکن اگر حکومتی سرپرستی نہ ملی تو  بچی کچھی انڈسٹری بھی ختم ہو جائے گی۔

دوران گفتگو ان کا کہنا تھا کہ موجودہ فنکار اچھا کام کر رہے ہیں ان میں نکھار کی ضرورت ہے، حکومت کو چاہیے وہ ہنگامی بنیادوں پر انڈسٹری کی طرف توجہ دے۔

 مزید کہا کہ لاہور جیسے شہر میں جہاں کبھی فلموں کی ریل پیل ہوتی اب ویرانیاں ہیں اور انڈسٹری تقریبا کراچی شفٹ ہو چکی ہے بہت سے اداکار بھی اپنے روشن مستقبل کیلئے کراچی جاتے ہیں میں مایوس نہیں ہوں کیونکہ ہمارے پاس جو ٹیلنٹ ہے وہ دنیا میں کہیں نہیں ہے بس میں اس میں نکھار کی ضرورت ہے۔

ان کا مزید کہنا تھا کہ ہر دور میں کام کے تقاضے بدل جاتے ہیں ہر دور میں حالات مختلف ہوتے ہیں بس اسی حساب سے چلنا پڑتا ہے۔ حکومت سے گزارش کروں گا جو بھی فنڈز مختص کیے ہیں انہیں اصل حقداروں تک جلد از جلد پہنچایا جائے۔