نیشنل گرڈ کمپنی نے 220 کے وی گھارو گرڈ سٹیشن کے تعمیراتی کاموں کا آغاز کردیا

لاہور: نیشنل گرڈ کمپنی آف پاکستان (این جی سی) نے220/132 کے وی گھارو گرڈ سٹیشن کے تعمیراتی کاموں کا آغاز کر دیا ہے۔

ڈپٹی منیجنگ ڈائریکٹر (اے ڈی اینڈ ایم) انجینئر رشید اے بھٹو نے منیجنگ ڈائریکٹر سیمنز انرجی، انجینئر ندیم علی کاظمی اور جرمن بینک کے ایف ڈبلیو کے کنٹری ڈائریکٹر سیباسٹن جیکب کے ہمراہ سندھ کے ضلع ٹھٹہ میں پراجیکٹ سائٹ پر منعقدہ تقریب میں گرڈ سٹیشن کا سنگ بنیاد رکھا۔ 

یہ پراجیکٹ گھارو ونڈ کلسٹرز میں واقع ونڈ پاور پلانٹس سے پیدا ہونے والی ماحول دوست بجلی کی قابل اعتماد ترسیل کو یقینی بنانے کے لیے ڈیزائن کیا گیا ہے۔

 

جرمن بینک کے ایف ڈبلیو نے اس گرڈ سٹیشن کی تعمیر کے لیے 27 ملین یورو فراہم کیے ہیں جو 24 ماہ میں مکمل کیا جائے گا۔ اس منصوبے میں دو ہائی پاور 220/132 کے وی، 250 ایم وی اے آٹو ٹرانسفارمرز، 220 کے وی جھمپیر اور دھابیجی گرڈ سٹیشنز سے منسلک ڈبل سرکٹ ٹرانسمیشن لائنز کے لیے دو 220 کے وی لائن بےز اور گھارو ونڈ پاور پلانٹس کے لیے چار 132 کے وی لائن بےز شامل ہیں۔

 

اس موقع پر منیجنگ ڈائریکٹر این جی سی، انجینئر الطاف حسین ملک نے گھارو گرڈ سٹیشن کا تعمیراتی کام شروع کرنے پر پراجیکٹ ڈیلیوری ساوتھ ٹیم کی کاوشوں کو سراہتے ہوئے انہیں کام کا اعلیٰ معیار برقرار رکھنے اور پراجیکٹ ٹائم لائنز پر پورا اترنے کی ہدایت کی۔

 

انجینئر رشید اے بھٹو نے تقریب سے خطاب کرتے ہوئے منصوبے کی اہمیت پر روشنی ڈالی اور کنٹریکٹرز پر زور دیا کہ وہ مقررہ شیڈول کے مطابق کام مکمل کریں، انہوں نے کہا کہ گھارو گرڈ سٹیشن پاکستان کے قابل تجدید توانائی کو مزید فروغ دے گا اور قومی ترسیلی نظام کو مستحکم کرے گا جس سے این جی سی اور حیسکو کے ترسیلی نظام میں وولٹیج پروفائل بہتر ہوگی اور لاسز کم کرنے میں مدد ملے گی۔

 

اس موقع پر منیجنگ ڈائریکٹر سیمنز انرجی، انجینئر ندیم علی کاظمی اور کے ایف ڈبلیو کے کنٹری ڈائریکٹر سیباسٹن جیکب نے بھی اپنے خیالات کا اظہار کیا اور نیشنل گرڈ کمپنی کے ساتھ تعاون جاری رکھنے کے عزم کا اعادہ کیا۔