ریپر طلحہٰ انجم نےکنسرٹ میں بھارتی پرچم لہرانے پر معافی مانگ لی

ویب ڈیسک : پاکستانی ریپر طلحہ انجم نے نیپال میں کنسرٹ کے دوران بھارتی پرچم اٹھانے کے واقعے پر افسوس کا اظہار کرتے ہوئے قوم سے معافی مانگ لی ہے۔

تفصیلات کے مطابق نجی ٹی وی پروگرام میں گفتگو کرتے ہوئے طلحہ انجم نے بتایا کہ پرفارمنس کے دوران ایک شخص نے اچانک ان کے ہاتھ میں بھارتی جھنڈا تھما دیا۔

واقعے کی وضاحت کرتے ہوئے طلحہ انجم نے کہا کہ اسٹیج پر صورتحال بالکل مختلف محسوس ہو رہی تھی۔ یہ لمحہ اس وقت پیش آیا جب وہ اپنا مشہور ڈِس ٹریک ’کون طلحہ‘ پرفارم کر رہے تھے، جو بھارتی ریپر نَیزی پر بنایا گیا ہے۔ ان کا کہنا تھا کہ انہوں نے اس اشارے کو اسٹیج پر موجود بھارتی مداحوں کی حمایت کے طور پر لیا تھا۔

انہوں نے وضاحت کی کہ وہ اس جھنڈے کو لہرا نہیں رہے تھے بلکہ چند لمحوں کے لیے کاندھے پر رکھا تھا، جس کی ویڈیو سامنے آتے ہی تنازع پیدا ہوگیا۔

جب پروگرام میزبان نے سوال کرتے ہوئے انہیں توجہ دلائی کہ وہ پرچم ایک طرف رکھ بھی سکتے تھے، تو طلحہ انجم نے کہا کہ اُنہیں احساس ہی نہیں ہوا کہ وہ اسے کتنی دیر تک تھامے کھڑے رہے۔ اُس وقت کے ماحول میں مجھے اندازہ ہی نہیں ہوا کہ میں کتنے سیکنڈ تک اُس پرچم کے ساتھ کھڑا رہا۔

ریپرطلحہ انجم نے مزیدکہا کہ بھارتی پرچم لہرانا ان کا مقصد نہیں تھا، مگر اس واقعے سے اگر کسی کے جذبات مجروح ہوئے ہیں تو وہ دل سے معذرت خواہ ہیں اور قوم سے معافی چاہتے ہیں۔