فواد خان اور ماہرہ خان کی فلم ’’نیلو فر‘‘ سینما گھروں کی زینت بن گئی،رنگا رنگ پریمیر کا انعقاد

اداکارہ ماہرہ خان اور لالی وڈ سپر اسٹار ہیرو فواد خان کی فلم’’ نیلو فر‘‘ سینما گھروں کی زینت بن گئی۔

تفصیلات کے مطابق لاہور کے مقامی سینما میں پریمیئر شو کا انعقاد کیا گیا جس  میں اداکارہ ماہرہ خان ، فواد خان، بہروز سبزواری،گلوکار راحت فتح علی خاں ، اداکارہ ریشم، عاطف اسلم اور دیگر نے شرکت کر کے شو کو چار چاند لگا دئیے۔

اس موقع پر میڈیا سے گفتگو کرتے ہوئے ماہرہ خان اور فواد خان نے کہا کہ  فلم  کو روایتی موضوعات سے ہٹ کر بنایا گیا ہے، امید ہے شائقین کی توقعات پر پورا اترے گی۔ 

شوبز انڈسٹری کے دیگر ستاروں نے کہا کہ اس طرح کی فلمیں ہی انڈسٹری  کی بحالی میں معاون ثابت ہو سکتی ہیں، شوبز شخصیات نے پہلے روز مل بیٹھ کر فلم دیکھی اور اسے احسن کاوش قرار دیا

خیال رہے کہ لالی وڈ فلم نیلو فر میں ماہرہ  خان نے نابینا لڑکی کے کردار کو خوبصورتی سے نبھایا ہے جبکہ فواد خان فلمی رائٹر کے کردار میں جلوہ گر ہوئے۔