الیکشن کمیشن نے پی پی 289 ڈی جی خان کے ضمنی انتخاب کا شیڈول جاری کر دیا

اسلام آباد: الیکشن کمیشن آف پاکستان ( ای سی پی) نےپنجاب اسمبلی کے حلقہ پی پی 289 ڈیرہ غازی خان میں ضمنی انتخاب کا مکمل شیڈول جاری کردیا ہے۔

ترجمان الیکشن کمیشن کے مطابق ریٹرننگ آفیسرکی جانب سے پبلک نوٹس 8 دسمبر 2025 کوجاری کیا جائیگا، جس کے بعد امیدوار10 سے 12 دسمبر تک اپنے کاغذات نامزدگی ریٹرننگ آفیسر کے پاس جمع کرا سکیں گے، جمع شدہ کاغذات کی اسکروٹنی کا عمل 18 دسمبرتک مکمل کر لیا جائے گا۔

ترجمان نے مزید بتایا کہ کاغذات نامزدگی کی منظوری یا مسترد ہونے کے فیصلوں کے خلاف اپیلیں دائرکرنے کی آخری تاریخ 22 دسمبرمقرر کی گئی ہے جبکہ ان اپیلوں پر فیصلے 29 دسمبر تک سنائے جائیں گے۔

ای سی پی کے مطابق امیدواروں کی حتمی فہرست 30 دسمبر کو جاری کر دی جائے گی جس کے بعد انتخابی مہم کا آخری مرحلہ شروع ہوگا۔
جبکہ ضمنی انتخاب کی پولنگ 25 جنوری 2026 کو منعقد ہوگی اس موقع پر انتخابی عمل کو شفاف اور منصفانہ بنانے کیلئے سیکیورٹی، انتخابی مواد کی ترسیل اورانتظامی امورسے متعلق تیاریوں کو حتمی شکل دی جا رہی ہے۔

اس حوالے سےالیکشن کمیشن کا مزیدکہنا ہے کہ ووٹرز کی سہولت اورصاف شفاف انتخابی عمل یقینی بنانے کے لیے تمام ضروری اقدامات کیے جائیں گے۔

خیال رہے کہ حلقے کی یہ نشست محمود قادرکے قومی اسمبلی کے لیے منتخب ہونے کے باعث خالی ہوئی تھی، جس کے بعد الیکشن کمیشن نے آئینی تقاضوں کے مطابق انتخابی شیڈول جاری کیا ہے۔