پاکستان اور ایشیائی ترقیاتی بینک کے درمیان 730 ملین ڈالر کے اہم منصوبوں پر دستخط

ویب ڈیسک:پاکستان اور ایشیائی ترقیاتی بینک(اے ڈی بی) کے درمیان 730 ملین ڈالر کے دو اہم منصوبوں پر دستخط ہوگئے۔  

ترجمان اقتصادی امورکے مطابق ملین ڈالر مالیت کے سیکنڈ پاور ٹرانسمیشن منصوبے پر دستخط ہوئے، سرکاری ملکیتی اداروں کی ٹرانسفارمیشن پروگرام پر دستخط ہوئے جس کی مالیت 400 ملین ڈالر ہے۔

اس حوالے سےسیکرٹری اقتصادی امور محمد حمیر کریم نے اے ڈی بی کی مسلسل معاونت کو سراہا اور کہا کہ ٹرانسمیشن منصوبہ آنے والے پن بجلی کے منصوبوں سے 2,300 میگاواٹ بجلی کی ترسیل کو ممکن بنائے گا۔

محمد حمیر کریم کا کہنا تھا کہ منصوبہ موجودہ ٹرانسمیشن لائنوں پر اضافی بوجھ کو کم اور ہنگامی حالات میں نظام کی مضبوطی میں اضافہ کرے گا۔

سیکرٹری اقتصادی امور نے کہا کہ ٹرانسفارمیشن پروگرام، ایس او ای ایکٹ 2023 اور ایس او ای پالیسی 2023 پر مؤثر عملدرآمد کو مضبوط بنائے گا۔

دوسری جانب اے ڈی بی کی کنٹری ڈائریکٹر ایما فان نے ان اقدامات کے لیے حکومتِ پاکستان کے مضبوط عزم کو سراہا،انہوں نے کہا کہ سرکاری ملکیتی اداروں کی اصلاحات کا پروگرام حکومتِ پاکستان کی اصلاحاتی کوششوں کو مزید تقویت فراہم کرے گا۔