امریکا کے نائیجریا میں داعش کے ٹھکانوں پر فضائی حملے،متعدد شدت پسند ہلاک

ابوجا:امریکا نے نائیجیریا کے شمال مغربی علاقے میں داعش سے منسلک شدت پسندوں کے خلاف فضائی کارروائی کی ہے، جس میں متعدد جنگجو مارے گئے ہیں۔

امریکا نے نائیجیریا کی حکومت کی درخواست پر ملک کے شمال مغرب میں داعش سے وابستہ شدت پسندوں کے خلاف فضائی کارروائی کی ہے، جس میں کئی دہشت گرد مارے جانے کا دعویٰ کیا گیا ہے۔

غیر ملکی میڈیا رپورٹس کے مطابق امریکی صدر ڈونلڈ ٹرمپ اور امریکی فوج کا کہنا ہے کہ یہ کارروائی نائیجیریا کی حکومت کی درخواست پر سوکوٹو ریاست میں کی گئی، جہاں شدت پسند گروہ مبینہ طور پر مقامی آبادی، بالخصوص مسیحی برادری کو نشانہ بنا رہا تھا۔

امریکی افریقہ کمانڈ کے مطابق حملہ نائیجیریا کے سکیورٹی اداروں کے ساتھ قریبی رابطے اور تعاون سے کیا گیا، جس میں داعش کے متعدد جنگجو ہلاک ہوئے۔

امریکی فوج کے مطابق کارروائی سے قبل نائیجیریا میں انٹیلی جنس پر مبنی پروازیں بھی کی جا رہی تھیں تاکہ شدت پسندوں کے ٹھکانوں کی نشاندہی کی جا سکے، پینٹاگون کی جانب سے جاری ویڈیو میں ایک جنگی جہاز سے میزائل داغے جانے کے مناظر بھی دکھائے گئے ہیں۔

اس حوالےسے امریکی وزیر دفاع پیٹ ہیگستھ نے بھی نائیجیریا کی حکومت کا شکریہ ادا کرتے ہوئے کہا ہے کہ دہشتگردوں کے خلاف کارروائیاں جاری رہیں گی۔

فضائی حملوں کے بعد صدر ٹرمپ نے سوشل میڈیا پر جاری بیان میں کہا کہ داعش کے شدت پسند علاقے میں خاص طور پر مسیحی برادری کو نشانہ بنا رہے تھے، ملک میں بے گناہ افراد کو قتل کیا جا رہا تھا، جس پر امریکی فوج نے فیصلہ کن کارروائی کی۔

دوسری جانب نائیجیریا کی وزارت خارجہ نے کہا ہے کہ یہ حملہ امریکا اور نائیجیریا کے درمیان جاری سکیورٹی تعاون کا حصہ ہے، جس میں انٹیلی جنس معلومات کا تبادلہ اور مشترکہ حکمت عملی شامل ہے۔

نائیجرین وزارت خارجہ نے مزید کہا کہ شمال مغربی علاقوں میں دہشتگردوں کے خلاف فضائی کارروائیوں سے شدت پسندوں کو بھاری نقصان پہنچا ہے۔

خیال رہے کہ نائیجیریا کے مختلف حصے گزشتہ کئی برسوں سے شدت پسند تنظیموں کی سرگرمیوں کی زد میں ہیں، جہاں سیکیورٹی فورسز کو مسلسل چیلنجز کا سامنا ہے۔