کراچی: سہراب گوٹھ میں گھر سے افغان خاتون اور 3 بچوں کی پھندا لگی لاشیں برآمد،تفتیش جاری

کراچی:شہر قائد کے علاقے سہراب گوٹھ گنا منڈی کے ایک گھر سے 4 لاشیں ملی ہیں۔

ریسکیو حکام کے مطابق مرنے والوں میں ایک خاتون اور تین بچے شامل ہیں، بظاہر یہ معاملہ خودکشی کا لگ رہا ہے۔
پولیس نے بتایا کہ بچوں کی عمر 2، 4 اور 8 سال کے درمیان ہیں جبکہ چاروں لاشیں پھندا لگی ہیں اور بظاہر معاملہ خود کشی کا لگ رہا ہے، مرنے والوں میں 30 سال کی فاطمہ، 10سال کی سونم، 3سال کی آرزو اور 2سال کا ارمان شامل ہیں۔

پولیس کے مطابق مرنے والی خاتون کا تعلق افغانستان سے ہے جبکہ شوہر نجیب اللہ کا تعلق لیہ سے ہے، نجیب اللہ سبزی منڈی میں کام کرتا ہے اور اس نے افغان خاتون سے دوسری شادی کی تھی۔

پولیس حکام کا کہنا ہے کہ خاتون کے شوہر کو حراست میں لے لیا گیا ہے اور معاملے کی تفتیش جاری ہے، شوہرکے بیان کے مطابق واقعہ گھریلو جھگڑے کے باعث پیش آیا۔

 دوسری جانب صوبائی وزیر داخلہ ضیالنجار نے واقعے کا نوٹس لیتے ہوئے ایس ایس پی سے رپورٹ طلب کرلی ہے ۔

وزیر داخلہ نے زور دیا ہے کہ تفتیش کو غیرجانبدار بنایا جائے اور اگر کسی قسم کی مجرمانہ غفلت یا جرم ثابت ہو تو ذمہ داروں کو قانون کے کٹہرے میں لایا جائے۔