وینزویلا کے گرفتار صدر نکولس مادورو کو نیویارک کی جیل منتقل کردیا گیا

نیویارک:وینزویلا کے صدر نکولس مادورو کو اتوار کے روز امریکا لانے کے بعد نیویارک کی ایک جیل  منتقل کردیا گیا ہے۔

نکولس مادورو اور ان کی اہلیہ کو ہفتے کے روز وینزویلا میں امریکی فوجی آپریشن کے دوران گرفتار کیا گیا تھا

ویڈیو میں 63 سالہ نکولس مادورو کو انگریزی میں یہ کہتے ہوئے بھی سنا گیا کہ ’گڈ نائٹ، ہیپی نیو ایئر‘۔

امریکی میڈیا کے مطابق 63 سالہ رہنما کو پہلے یو ایس ڈرگ انفورسمنٹ ایڈمنسٹریشن کے دفاتر اور پھر بروک لین میں واقع وفاقی جیل میٹروپولیٹن حراستی مرکز لے جایا گیا،یہ وہی حراستی مرکز ہے جہاں گذشتہ برس ٹرائل کے دوران امریکی ریپر شان ’ڈیڈی‘ کومز کو رکھا گیا تھا۔

وائٹ ہاؤس کی جانب سے سوشل میڈیا پر جاری کی گئی ایک ویڈیو میں دیکھا جا سکتا ہے کہ امریکی ڈرگ انفورسمنٹ ایڈمنسٹریشن (ڈی ای اے)  کے اہلکار نکولس مادورو کو ہتھکڑیاں لگا کر نیویارک کے علاقے مین ہیٹن میں ڈی ای اے کی ایک عمارت کے اندر لے جا رہے ہیں۔

مادورو اور ان کی اہلیہ کو نیویارک میں جج کے سامنے پیش کیا جائے گا تاہم اس کی تاریخ کا تعین نہیں کیا گیا۔ ان پر ’منشیات کے ذریعے دہشت گردی،‘ امریکہ میں کوکین سمگل کرنے اور غیر قانونی ہتھیار رکھنے کے الزامات عائد کیے گئے ہیں۔

دوسری جانب وینزویلا کی نائب صدر نے عدالتی حکم پر صدارتی ذمہ داریاں سنبھال لی ہیں،قوم سے خطاب میں ڈیلسی روڈریگز نے امریکی صدر ڈونلڈ ٹرمپ کے بیان سے اختلاف کیا اور نکولس مادورو کی فوری رہائی کا مطالبہ کیا۔

ڈیلسی روڈریگز نے کہا وینزویلا کے واحد صدر نکولس مادورو ہی ہیں، وینزویلا کسی بھی ملک کی کالونی نہیں بنے گا۔ ساتھ ہی انہوں نے ملک اور قدرتی وسائل کے دفاع کا عزم بھی کیا۔