کشمیر جلد آزادی کی صبح دیکھے گا،مسئلہ کشمیر کو ہر عالمی فورم پر اجاگر کرتے رہیں گے،فیلڈ مارشل

مظفر آباد: فیلڈ مارشل سید عاصم منیرکا کہنا ہے کہ کشمیر جلد آزادی کی صبح دیکھے گا،مسئلہ کشمیر کو ہرعالمی فورم پر اجاگر کرتے رہیں گے۔

پاک فوج کے شعبہ ےتعلقات عامہ(آئی ایس پی آر)کے مطابق چیف آف ڈیفنس فورسز فیلڈ مارشل سید عاصم منیر نے مظفرآباد کا دورہ کیا،کور کمانڈر راولپنڈی نے ان کا استقبال کیا۔

ترجمان کے مطابق فیلڈ مارشل نے یادگارِ شہدائے جموں و کشمیر پر حاضری دی اور شہدائے کشمیر کو خراجِ عقیدت پیش کیا۔فیلڈ مارشل نے یادگارِ شہدا پر پھولوں کی چادر چڑھائی اور فاتحہ خوانی بھی کی۔

اس موقع پر فیلڈ مارشل سید عاصم منیرکا کہنا تھا کہ پاکستان کی کشمیری عوام کی سیاسی، اخلاقی اور سفارتی حمایت غیر متزلزل ہے،بھارتی مظالم کشمیری عوام کی جدوجہد اور امنگوں کو دبا نہیں سکے۔

ترجمان آئی ایس پی آر کے مطابق فیلڈ مارشل نے مزید کہا کہ کشمیر جلد آزادی کی صبح دیکھے گا،مسئلہ کشمیر کو ہر عالمی فورم پر اجاگر کرتے رہیں گے،مسئلہ کشمیر کا حل اقوامِ متحدہ کی قراردادوں کے مطابق ہونا چاہیے۔

اس موقع پر فیلڈ مارشل سید عاصم منیر نے کشمیر میں تعینات افسران و جوانوں کی پیشہ ورانہ صلاحیتوں کی تعریف کی،انہوں نے کہا کہ کسی بھی جارحیت کا فوری اور منہ توڑ جواب دیا جائے گا، مسلح افواج ہر قسم کے خطرات کا مقابلہ کرنے کیلئے مکمل طور پر تیار ہیں۔