وزیراعظم کی چین کے قمری سال نو کے موقع پر چینی قیادت اور عوام کو مبارکباد 

ویب ڈیسک:وزیراعظم محمد شہباز شریف نے چین کے قمری سال نو کے موقع پر چین کی قیادت اور عوام کو مبارکباد دی ہے۔

تفصیلات کے مطابق سماجی رابطے کی ویب سائٹ پر اپنے پیغام میں وزیراعظم نے صدر شی جن پنگ اور چین کے برادر عوام سمیت دنیا بھر میں مقیم چینی برادری کو “گونگ شی فا چائے” کہتے ہوئے نئے سال کی مبارکباد دی ۔سال نوع کو گھوڑے سے منسوب کیا گیا ہے۔

ایکس پر جاری بیان میں وزیراعظم نے کہا کہ گھوڑا توانائی، ثابت قدمی اور رفتار کی علامت ہے، جو پاکستان اور چین کے مشترکہ سفر کی ترجمانی کرتی ہے۔

وزیراعظم کا کہنا تھا کہ پاکستان اور چین “آئرن برادرز” ہیں اور دونوں ممالک ایک مضبوط آل ویدر اسٹریٹجک کوآپریٹو پارٹنرشپ کے رشتے میں بندھے ہوئے ہیں جس کی بنیاد امن، ترقی اور علاقائی روابط کے مشترکہ وژن پر ہے۔

وزیراعظم نے اُمید ظاہر کی کہ نیا چینی سال دونوں ممالک کے درمیان دیرینہ دوستی کو مزید مضبوط اور عوام کی خوشحالی کے لیے باہمی تعاون میں اضافے کا باعث ہوگا۔

بیا ن میں وزیراعظم شہبا زشریف نے مزیدکہا کہ پوری پاکستانی قوم چین کے عوام کی صحت، کامیابی اور ترقی کے لیے نیک خواہشات میں ان کے ساتھ شریک ہے۔