سیمی فائنل کی دوڑ: پاکستان اور سری لنکا کے مابین ٹاکرا آج ہو گا

کولمبو: پاکستان اور نیوزی لینڈ کے مابین آئی سی سی ٹی ٹوئنٹی ورلڈ کپ کے سیمی فائنل تک رسائی حاصل کرنے کیلئےدوڑ جاری ہے۔ اسی سلسلے میں پاکستان اور سری لنکا کے مابین فیصلہ کن میچ آج کھیلا جائے گا جو کہ سیمی فائنل کا فیصلہ کرے گا۔

تفصیلات کے مطابق اس میچ میں نہ صرف پاکستان کو فتح درکار ہے بلکہ رن ریٹ کا بڑا چیلنج بھی درپیش ہے، میچ پاکستانی وقت کے مطابق شام ساڑھے چھ بجے شروع ہوگا۔

پاکستان کو سیمی فائنل میں جانے کیلئے سری لنکا کو 64 رنز سے شکست دینا ہوگی اور اگر سری لنکا نے پہلے بیٹنگ کی تو ہدف کا تعاقب کرتے ہوئے پاکستان کو مطلوبہ ہدف 13.1 اوورز میں حاصل کرنا ہوگا۔

جبکہ پاکستان کی شکست یا برے رن کی وجہ سے نیوزی لینڈ سیمی فائنل کے لئے کوالیفائی کر جائے گا، پاکستان کو فتح حاصل کرنے کے لئے مڈل اوورز میں اپنی محتاط حکمت عملی ترک کرنا ہوگی۔

اسپورٹس ویب سائٹ کرک انفو کی رپورٹ کے مطابق بابر اعظم کی ٹی ٹوئنٹی سیٹ اپ میں جگہ پہلے ہی زیر بحث تھی اور موجودہ تقاضوں کے پیش نظر ان کا سست اسٹرائیک ریٹ مزید سوالات کھڑے کر رہا ہے۔

دوسری جانب سری لنکا پہلے ہی سپر ایٹ مرحلے سے باہر ہو چکا ہے تاہم وہ اعزاز کی خاطر کھیلتے ہوئے پاکستان کے راستے میں رکاوٹ ڈال سکتا ہے، نوجوان سپنر دونیتھ ویلالاگے پاکستانی ٹاپ آرڈر کے لیے خطرہ ثابت ہو سکتے ہیں۔