صدر مملکت اوروزیراعظم کا خواتین کو بااختیاربنانے کیلئے سازگارماحول یقینی بنانے کاعزم

اسلام آباد:صدر آصف علی زرداری اور وزیراعظم محمد شہباز شریف نے خواتین کی صلاحیتوں کو بروئے کار لانے کی غرض سے ان کیلئے سازگار ماحول کو یقینی بنانے کا عزم ظاہر کیا ہے۔

تفصیلا ت کے مطابق آج (اتوار) منائے جانے والے خواتین کے عالمی دن کے موقع پر اپنے الگ الگ پیغامات میں انہوں نے پاکستان اور دنیا بھر کی خواتین، ماؤں، بہنوں اور بیٹیوں کو خراج تحسین پیش کیا۔

صدر مملکت نے کہا کہ حکومت خواتین کی تعلیم اور صحت کی دیکھ بھال تک رسائی کو بڑھانے، معاشی مواقع کو مضبوط بنانے، تشدد کے خاتمے اور تحفظ کو بہتر بنانے کے لیے کام کر رہی ہے۔

انہوں نے کہا کہ پارلیمنٹ اور صوبائی اسمبلیوں میں خواتین کی نمائندگی کو آئینی دفعات کے ذریعے یقینی بنایا گیا ہے۔

اپنے بیان میں وزیراعظم نے اس بات پر زور دیا کہ قوم کی مجموعی ترقی اور خوشحالی خواتین کے لیے مساوی مواقع اور ان کی بامعنی شمولیت سے ہی حاصل کی جا سکتی ہے۔

انہوں نے کہا کہ خواتین کی محنت، عزم و ہمت اور زندگی کے ہر شعبے میں گراں قدر خدمات ہمارے لیے من الحیث قوم باعث فخر اور باعث تقویت ہیں، خواتین نہ صرف خاندان بلکہ، معاشرہ اور قوم کی مثبت اقدار پر مبنی بنیاد میں کلیدی حیثیت رکھتی ہیں، تعلیم سے لے کر کھیل تک، گھروں سے لےکر حکومت تک، پاکستانی خواتین کی استقامت اور کامیابیاں ایک مضبوط اور خوشحال ملک کی تعمیر میں انقلابی کردار ادا کر رہی ہیں۔