اسحاق ڈار کا چینی وزیر خارجہ سےٹیلیفونک رابطہ، مشرقِ وسطیٰ میں جنگ بندی اور امن کی بحالی پر زور

اسلام آباد: نائب وزیراعظم و وزیر خارجہ اسحاق ڈار نےعوامی جمہوریہ چین کے وزیر خارجہ وانگ ای کے ساتھ ٹیلیفونک رابطہ کیا جس میں مشرق وسطیٰ کی موجودہ صورتحال پر تفصیلی تبادلہ خیال کیا گیا۔

تفصیلات کے مطابق ترجمان دفتر خارجہ طاہر اندرابی کا کہنا ہے کہ ٹیلیفونک رابطےمیں دونوں رہنماؤں نے مشرق وسطیٰ میں فوری جنگ بندی اور امن کی بحالی کی ضرورت پر زور دیتے ہوئے خطے میں استحکام کے لیے تمام کوششوں کی حمایت کا اعادہ کیا۔

ترجمان کے مطابق گفتگو کے دوران کشیدگی کے خاتمے، امن مذاکرات کی بحالی اور عام شہریوں کے تحفظ کو یقینی بنانے پر بھی اتفاق کیا گیا۔

ترجمان نے مزید بتایا کہ فریقین نے بحری گزرگاہوں کی سیکیورٹی کو برقرار رکھنے اور اقوام متحدہ کے چارٹر کی پاسداری کی اہمیت پر زور دیا۔ چینی وزیر خارجہ وانگ ای نے قیام امن کے لیے پاکستان کی کوششوں کو سراہتے ہوئے ان کا اعتراف کیا۔

ترجمان کے مطابق ٹیلیفونک گفتگو کے دوران دونوں ممالک نے اس عزم کا اظہار کیا کہ تمام تنازعات کو بات چیت اور سفارت کاری کے ذریعے حل کرنے کی کوششیں جاری رکھی جائیں گی۔