حوثیوں کا اسرائیل پر میزائل حملہ ،جنگ میں باقاعدہ شمولیت کی دھمکی دے دی

صنعا:یمن کے ایران سے ہم آہنگ حوثی باغیوں نے ہفتے کو پہلی بار اسرائیل پر میزائل حملہ داغا ہے، جس سے اسرائیل اور امریکا کے ساتھ جاری ایران جنگ میں ان کی براہِ راست شمولیت سامنے آگئی ہے۔

قطری نشریاتی ادارے الجزیرہ کے مطابق یمن کے حوثی فوجی ترجمان یحیی ساری نے تصدیق کرتے ہوئے کہا ہے کہ گروپ نے اسرائیل کے خلاف اپنا پہلا فوجی حملہ کیا ہے۔

علاوہ ازاں برطانوی خبر رساں ادارے رائٹرز کے مطابق اسرائیل نے پہلے اعلان کیا تھا کہ وہ یمن سے داغا گیا میزائل ناکارہ بنانے کی کوشش کر رہا ہے۔ 

رائٹرز کے مطابق حوثی گروپ نے بتایا کہ یہ حملہ متعدد میزائلوں کی شکل میں کیا گیا اور اس کی وجہ ایران، لبنان، عراق اور فلسطینی علاقوں میں جاری بنیادی ڈھانچے پر حملے تھے۔

حوثیوں نے واضح کیا کہ ان کے آپریشن جاری رہیں گے اور وہ تب تک ختم نہیں ہوں گے جب تک تمام محاذوں پر جاری جارحیت ختم نہیں ہو جاتی۔

علاوہ ازاں سرائیلی فوج نے تصدیق کی ہے کہ جنگ کے آغاز کے بعد پہلی بار یمن سے اسرائیلی حدود کی جانب میزائل داغا گیا ہے، جسے ناکارہ بنانے کے لیے دفاعی نظام کو متحرک کر دیا گیا،حملے کے بعد ملک بھر میں سائرن بج اٹھے اور شہریوں کو پناہ گاہوں میں منتقل ہونے کی ہدایت کی گئی۔

دوسری جانب حوثی ترجمان یحییٰ سریع نے سخت وارننگ دیتے ہوئے کہا ہے کہ ان کی "انگلیاں ٹریگر پر" ہیں اور اگر ایران یا کسی بھی مسلم ملک کے خلاف بحیرہ احمر کو استعمال کیا گیا یا کشیدگی بڑھی، تو وہ براہِ راست جنگ میں شامل ہو جائیں گے۔