مشرق وسطیٰ میں کشیدگی: اسحاق ڈار کی مصر ی وزیر خارجہ کے بعد ترک ہم منصب سے ملاقات

اسلام آباد: مشرق وسطیٰ میں جاری کشیدگی اور بحران کے حل کیلئے پاکستان کی جانب سے بھرپور سفارتی کوششیں جاری ہیں،اسحاق ڈار سے مصر کے وزیر خارجہ ڈاکٹر بدر عبدالعاطی کے بعد ترکیہ کے وزیر خارجہ خاقان فیدان سے ملاقات ہوئی جس میں دو طرفہ امور سمیت خطے کی صورتحال پر تبادلہ خیال کیا گیا۔

 دفتر خارجہ کے مطابق دفتر خارجہ پہنچنے پر نائب وزیراعظم و وزیر خارجہ اسحاق ڈار نے ترک وزیر خارجہ حاقان فیدان کا استقبال کیا۔ ترجمان کے مطابق اسلام آباد میں ہونے والی ملاقات میں پاکستان اور ترکیہ کے مضبوط دوطرفہ تعلقات کی توثیق کی گئی جبکہ ملاقات میں ایران سمیت علاقائی صورتحال پر تبادلہ خیال بھی ہوا۔

ترجمان دفتر خارجہ کامزید کہنا ہے کہ دونوں رہنماؤں کے درمیان امن واستحکام کے لیے مکالمے، کشیدگی میں کمی اور سفارتکاری پر زور دیا گیا، ملاقات میں علاقائی ہم آہنگی اور تعاون بڑھانے پر اتفاق بھی کیا گیا۔

خیال رہے کہ اس سےقبل مصری وزیر خارجہ نے اسحاق ڈار سے ملاقات کی تھی۔

دونوں ممالک کے وزرائے خارجہ کی ملاقات میں پاکستان اور مصر کے درمیان دوطرفہ تعلقات اور باہمی تعاون کے فروغ پر تبادلہ خیال کیا گیا۔ دونوں وزرائے خارجہ علاقائی صورتحال پر تبادلہ خیال بھی کیا۔