امریکا ایران مذاکرات: امریکی نائب صدر میری لینڈ سے پاکستان کیلئے روانہ

میری لینڈ:پاکستان کی ثالثی میں ہونے والے ایران امریکا امن مذاکرات میں شرکت کرنے کیلئے امریکی نائب صدر جے ڈی وینس میری لینڈ سے اسلام آباد کیلئے روانہ ہوگئے ہیں۔

روانگی سے قبل میڈیا سے گفتگو کرتے ہوئے امریکی نائب صدر نے کہا کہ تعمیری گفتگو کے خواہاں ہیں،صدر ٹرمپ نے مذاکرات کی واضح ہدایات دی ہیں، وہ توقع کرتے ہیں کہ یہ مذاکرات تعمیری اور معنی خیز ہوں گے۔

گفتگو میں انہوں نے کہا کہ ڈونلڈ ٹرمپ پہلے ہی واضح کر چکے ہیں کہ اگر ایران نیک نیتی کے ساتھ مذاکرات کے لیے تیار ہے تو امریکا بھی کھلے دل کے ساتھ آگے بڑھے گا۔

انہوں نے مزید کہا کہ اگر ایران نے اس صورت حال سے ناجائز فائدہ اٹھانے کی کوشش کی تو امریکی وفد کسی قسم کی لچک کا مظاہرہ نہیں کرے گا اور ایسا رویہ قطعی طور پر قابلِ قبول نہیں ہوگا، ان کا کہنا تھا کہ یقین ہے کہ ایران کے ساتھ مذاکرات مثبت ہوں گے ،امید کرتے ہیں مذاکرات مثبت سمت میں آگے بڑھیں گے۔

دوسری جانب اسلام آباد میں مذاکرات کے دوران امریکی وفد نقل و حرکت کیلئے اپنی گاڑیاں استعمال کرے گا۔

ایران امریکا مذاکرات کے لیے امریکا کے نائب صدر جے ڈی وینس کی آمد سے قبل جمعرات کو خصوصی طیارہ سی 15 امریکی وفد کیلئے خصوصی گاڑیاں لیکر پہنچا۔

خیال رہے کہ پاکستان کی میزبانی میں ایران اور امریکا کے مذاکرات آج اور کل اسلام آباد میں ہوں گے۔ وفود کی سطح پر مذاکرات آج اور اہم مرکزی مرحلہ ہفتے کو ہو گا۔