کشمیر پریمئیر لیگ اپنے شیڈول کے مطابق ہوگی: شہریار آفریدی

تفصیلات کے مطابق شہریار آفریدی نے کہا کہ بھارتی حکومت سے درخواست ہے کہ کھیل کو سیاست سے الگ رکھے ، کھیل عوام کو جوڑتے ہیں جبکہ نفرتیں لوگوں کو توڑتی ہیں، بھارتی حکومت اور بی سی سی آئی سے گزارش ہے کہ کرکٹ جینٹلمین گیم ہے اسے اپنی گندی سیاست سے آلودہ نہ کریں۔

انہوں نے کہا کہ کشمیر پریمئیر لیگ کشمیری نوجوانوں کو عالمی سطح پر اپنی صلاحیتوں کو اجاگر کرنے کا موقع فراہم کریگی ۔

شہر یار آفریدی نے کہا کہ عالمی کھلاڑی ہرشل گبز اور تلکرتنے دلشان کشمیر پریمئیر لیگ میں حصہ لینے کیلئے کل پاکستان پہنچیں گے ، دونوں کھلاڑیوں ، انکے کرکٹ بورڈز اور حکومتوں کو کرکٹ کو سپورٹ کرنے پر خراج تحسین پیش کرتے ہیں۔

چیئرمین کشمیر کمیٹی کا مزید کہنا ہے کہ امید ہے کہ پاکستان کرکٹ بورڈ جلد ہی فخر زمان، شاداب خان، عثمان قادر، امام الحق اور محمد حسنین کو کشمیر پریمئیر لیگ کھیلنے کیلئے این او سی جاری کردے گا ۔