وزیرِ اعظم شہباز شریف 23 تا 25 مئی چین کا دورہ کریں گے

اسلام آباد:وزیراعظم شہباز شریف کے رواں ماہ کے دوران چین کا اہم سرکاری دورہ کرنے کا امکان ہے، جس کے لیے تاریخوں اور ملاقاتوں کو حتمی شکل دی جا رہی ہے۔

ذرائع کے مطابق وزیراعظم کا یہ دورہ 23 سے 25 مئی تک متوقع ہے، جس کے دوران دونوں ممالک کے درمیان اسٹریٹجک تعلقات کو مزید مضبوط بنانے پر توجہ دی جائے گی۔

ذرائع کا کہنا ہے کہ دورے کے دوران وزیراعظم شہباز شریف چینی صدر ژی جن پنگ اور اپنے ہم منصب وزیراعظم لی چیانگ سے اعلیٰ سطح کی ملاقاتیں کریں گے،ان ملاقاتوں میں پاکستان اور چین کے درمیان “آئرن کلاڈ” اسٹریٹجک شراکت داری اور سی پیک (CPEC) کے تحت جاری تعاون کو مزید وسعت دینے پر تفصیلی تبادلہ خیال کیا جائے گا۔

وزیراعظم کی جانب سے پاکستان اور چین کے سفارتی تعلقات کی 75 ویں سالگرہ کے سلسلے میں منعقدہ خصوصی تقریبات میں شرکت بھی متوقع ہے۔اس دورے کی اہمیت اس لحاظ سے بھی بڑھ گئی ہے کہ دونوں ممالک کے درمیان مختلف شعبوں میں تعاون کو فروغ دینے کے لیے متعدد مفاہمتی یادداشتوں (MoUs) اور اہم معاہدوں پر دستخط بھی متوقع ہیں۔

ذرائع کے مطابق اس دورے سے دو طرفہ اقتصادی روابط اور علاقائی امن و استحکام کے لیے جاری کوششوں کو نئی تقویت ملے گی۔