پاک افواج کا افغان بارڈر پر تاریخی آپریشن، فتح کی داستان، جرات کے نشان کا ٹیزر ریلیز

راولپنڈی:پاک افواج نے افغان بارڈر پر ایک تاریخی اور فیصلہ کن آپریشن کی تفصیلات پر مبنی نیا ٹیزر فتح کی داستان، جرات کے نشان جاری کر دیا ہے، جسے عوامی و عسکری حلقوں میں بھرپور پذیرائی حاصل ہو رہی ہے۔

تفصیلات کے مطابق معرکہ حق کی آمد سے قبل پاک فوج کے ایمان، بہادری اور پیشہ وارانہ مہارت پر مبنی سیریز جرات کے نشان کا دلوں کو چھو لینے والا ٹیزر بھی ریلیز کیا گیا ہے، جو قوم کے حوصلے اور عزم کی عکاسی کرتا ہے۔

اس سیریز کی حالیہ قسط میں اپریل 2025 کے دوران پاک فوج کی 25 سے 27 اپریل تک کی گئی تاریخی اور جرات مندانہ کارروائی کو اجاگر کیا گیا ہے، جس میں بھارتی سرپرستی میں سرگرم خوارج کی بڑی تشکیل کے خلاف   موثر آپریشن کیا گیا۔

اطلاعات کے مطابق خوارج کے ایک بڑے گروہ نے ڈیورنڈ لائن پر باڑ کاٹ کر پاکستان میں دراندازی کی کوشش کی، تاہم پاک فوج نے جدید انٹیلیجنس، ڈرون ٹیکنالوجی اور زمینی کارروائی کے ذریعے دشمن کے منصوبے کو ناکام بنا دیا۔

آپریشن کے دوران پاک افواج نے انتہائی مہارت سے خوارج کی بڑی تشکیل کو گھیر کر موثر کارروائی کی اور 71 دہشتگردوں کو جہنم واصل کیا۔

ذرائع کے مطابق محدود تعداد میں تعینات پاک فوج کے جوانوں نے غیر معمولی پیشہ وارانہ صلاحیتوں کا مظاہرہ کرتے ہوئے دشمن کے عزائم کو خاک میں ملا دیا اور تمام آپریشن کو کامیابی سے مکمل کیا۔

عسکری حلقوں کے مطابق یہ کارروائی پاکستان کی انسدادِ دہشتگردی حکمت عملی میں ایک اہم سنگِ میل کی حیثیت رکھتی ہے، جبکہ ان ہیروز کی بہادری اور قربانی کو تاریخ ہمیشہ یاد رکھے گی۔