صدرمملکت آصف علی زرداری کی روس کی قیادت کو یومِ فتح پر مبارکباد

اسلام آباد:صدر آصف علی زرداری نے روسی فیڈریشن کے صدر ولادیمیر پیوٹن اور روسی عوام کو یومِ فتح پر مبارکباد دیتے ہوئے کہا ہے کہ فسطائیت کے خلاف عظیم جنگ میں فتح، روس کے عوام کی عالمی جدوجہد میں دی گئی قربانیوں کی ایک پْر وقار یادگار ہے۔

تفصیلات کے مطابق اپنے تہنیتی پیغام میں صدرمملکت نے کہا کہ یہ تاریخی کامیابی نہ صرف روسی قوم کی ہمت اور عزم بلکہ عالمی امن، سلامتی اور استحکام کے لیے ان کے کردار کی بھی علامت ہے۔

بیان میں صدر آصف زرداری نے کہا کہ پاکستان روس کے ساتھ اپنے تعلقات کو قدر کی نگاہ سے دیکھتا ہے اور ایک منصفانہ، پرامن اور قواعدوضوابط پر مبنی بین الاقوامی نظام کے لیے مشترکہ عزم کو ظاہر کرتا ہے۔

انہوں نے نازی ازم کے خلاف جنگ میں جانیں قربان کرنے والے تمام افراد کو خراج تحسین پیش کیا، جن میں آج کے پاکستان کے سپاہی بھی شامل تھے، جنہوں نے اتحادی افواج میں خدمات انجام دیں۔

صدر مملکت نے اس امید کا اظہار کیا کہ اس تاریخی فتح کا جذبہ دونوں ممالک کے درمیان تعاون، باہمی مفاہمت اور دوستی کو فروغ دیتا رہے گا۔