وزیراعظم شہباز شریف کی زیر صدارت ترقیاتی بجٹ اور پی ایس ڈی پی منصوبوں پر جائزہ اجلاس

اسلام آباد: وزیرِ اعظم محمد شہباز شریف کی زیر صدارت رواں برس کے ترقیاتی بجٹ اور آئندہ مالی سال کے لیے پبلک سیکٹر ڈویلپمنٹ پروگرام (پی ایس ڈی پی) کے منصوبوں پر جائزہ اجلاس اسلام آباد میں منعقد ہوا۔

تفصیلات کے مطابق اجلاس میں ملک بھر کے جاری ترقیاتی منصوبوں اور آئندہ مالی سال کے مجوزہ منصوبوں پر تفصیلی غور کیا گیا اور ان کے لیے درکار فنڈز اور پیش رفت سے متعلق بریفنگ دی گئی۔

دوران اجلاس وزیرِ اعظم نے ہدایت کی کہ بہتر کارکردگی دکھانے والی وزارتوں کو ترقیاتی منصوبوں کے لیے ترجیحی بنیادوں پر بجٹ فراہم کیا جائے تاکہ منصوبوں کی بروقت تکمیل یقینی بنائی جا سکے۔

انہوں نے کہا کہ عوامی پیسہ صرف ان ترقیاتی منصوبوں پر خرچ کیا جائے گا جن کے نتائج یقینی اور دیرپا ہوں۔ وزیرِ اعظم نے پانی کے ذخائر اور پن بجلی کے منصوبوں کو ترقیاتی بجٹ کی اولین ترجیحات میں شامل کرنے کی ہدایت کی اور اس ضمن میں پبلک پرائیویٹ پارٹنرشپ کو مزید فروغ دینے پر زور دیا۔

علاوہ ازاں اجلاس میں وزیرِ اعظم نے پانڈا بانڈز کے کامیاب اجراء اور عالمی مارکیٹ میں ان کی پذیرائی پر وزیرِ خزانہ کی کارکردگی کو سراہا۔ اسی طرح ریلوے، آئی ٹی اور وزارتِ پاور کی کارکردگی کی بھی تعریف کی گئی۔

اجلاس کو قومی اہمیت کے آبی ذخائر اور پن بجلی کے منصوبوں بشمول داسو، دیامر بھاشا اور مہمند ڈیمز پر جاری پیش رفت سے آگاہ کیا گیا۔اجلاس میں نائب وزیرِ اعظم و وزیرِ خارجہ اسحاق ڈار، وفاقی وزراء، وزیرِ مملکت اور دیگر اعلیٰ حکام نے شرکت کی۔