مسلح افواج ہر قسم کی دہشت گردی کے مکمل خاتمے کیلئے پرعزم ہیں،فیلڈمارشل

چیف آف آرمی سٹاف اور چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان کی مسلح افواج عوام کی غیر متزلزل حمایت کے ساتھ ہر قسم کی دہشت گردی کے مکمل خاتمے کے لیے پوری طرح پرعزم ہیں۔

وہ آج (منگل) کمانڈ اینڈ سٹاف کالج کوئٹہ میں زیر تربیت افسران اور فیکلٹی ممبران سے خطاب کر رہے تھے۔

فیلڈ مارشل نے کہا کہ پروپیگنڈے، جھوٹی خبروں یا بیرونی پشت پناہی میں کی جانے والی دہشت گردی کے ذریعے پاکستان کی ترقی کی راہ میں رکاوٹ نہیں ڈالی جا سکتی۔

انہوں نے دوٹوک الفاظ میں کہا کہ جو دشمن قوتیں پراکسیز اور پروپیگنڈے کے ذریعے پاکستان کی ترقی کو سبوتاژ کرنے کی کوشش کر رہی ہیں وہ ریاست کے عزم اور عوام کے اتحادکے ذریعے بالآخر ناکام ہوں گی۔

فیلڈ مارشل نے جدید جنگ کی تیزی سے بدلتی ہوئی نوعیت کے پیش نظر ،جدید ٹیکنالوجیز، کثیر جہتی کارروائیوں، تینوں مسلح افواج کے باہمی اشتراک اور مستقبل کے جنگی میدان کے چیلنجز سے باخبر رہنے کی اہمیت پر زور دیا۔