پاکستان کی اسرائیلی قابض افواج کی جانب سے گلوبل صموفلوٹیلا کو روکنے کی مذمت

پاکستان نے بین الاقوامی پانیوں میں اسرائیلی قابض افواج کی جانب سے گلوبل صمود فلوٹیلا کو غیر قانونی طور پر روکنے اور اس پر سوار امدادی کارکنوں کی جبری حراست اور ان کے ساتھ ناروا سلوک کی شدید مذمت کی ہے۔

دفتر خارجہ کے ترجمان طاہر اندرابی نے ایک بیان میں کہا کہ اطلاعات کے مطابق حراست میں لیے گئے افراد میں پاکستانی فلاحی کارکن سعد ایدھی بھی شامل ہیں۔

ترجمان نے غیر قانونی طور پر حراست میں لیے گئے تمام کارکنوں کی فوری رہائی کا مطالبہ کیا۔ انہوں نے عالمی برادری پر زور دیا کہ وہ ان افراد کی حفاظت، وقار اور بنیادی حقوق یقینی بنائے۔

طاہر اندرابی نے کہا کہ وزارت خارجہ حراست میں لیے گئے پاکستانی شہریوں کی باحفاظت واپسی یقینی بنانے کیلئے خطے میں پاکستانی سفارتی مشنز کے ساتھ مسلسل قریبی رابطے میں ہے۔