سی ٹی ڈی کا بنوں میں کامیاب آپریشن،8 خارجی جہنم واصل، 2 اہلکار شہید

بنوں:محکمہ انسداد دہشتگردی(سی ٹی ڈی ) اور پولیس نے بنوں کے علاقے میریان میں خفیہ اطلاع پر کامیاب انٹیلی جنس بیسڈ آپریشن کیا گیا جس میں 8 دہشت گرد مارے گئے، 2 پولیس اہلکار بھی شہید ہو گئے۔

تفصیلات کے مطابق پولیس اور سی ٹی ڈی کی مشترکہ ٹیموں نے آپریشن علی الصبح شروع کیا، شدید فائرنگ کے تبادلے میں 8 دہشت گردوں کے ہلاک جبکہ متعدد زخمی ہونے کی اطلاعات ملی ہیں۔

پولیس حکام کے مطابق آپریشن کے دوران 10کلوگرام وزنی دیسی ساختہ بم بھی برآمد کیا گیا جسے ناکارہ بنا دیا گیا ہے،حکام کے مطابق آپریشن کے دوران دو پولیس اہلکار شہید ہوئے جبکہ 3 جوان زخمی ہو گئے ہیں۔

دوسری جانب آئی جی پی خیبرپختونخوا ذوالفقار حمید نے کہا ہے کہ فتنہ الخوارج اور امن دشمن عناصر کے خلاف کارروائیاں مزید شدت کے ساتھ جاری رہیں گی۔انہوں نے کہا کہ خیبر پختونخوا پولیس عوام کے جان و مال کے تحفظ کیلئے فرنٹ لائن پر کھڑی ہے۔

علاوہ ازاں وفاقی وزیرداخلہ محسن نقوی نے فتنہ الخوارج کے 8 دہشتگردوں کو جہنم واصل کرنے پر خیبرپختونخوا پولیس اورسی ٹی ڈی کی بہادری اور پروفیشنل ازم کو سراہا کہ بروقت کارروائی کرکے خوارجیوں کے ناپاک عزائم کو ناکام بنایا۔

محسن نقوی نے کہا کہ خیبرپختونخوا پولیس اور سی ٹی ڈی کے بہادر سپوتوں پر ناز ہے، جام شہادت نوش کرنے والے پولیس اہلکار کو خراج عقیدت پیش کرتے ہیں، لواحقین سے دلی ہمدردی ہے۔