وزیرِ اعظم محمد شہباز شریف چار روزہ دورہء چین کے پہلے مرحلے میں ہانگژو پہنچ گئے

اسلام آباد:وزیرِ اعظم محمد شہباز شریف اپنے چار روزہ دورہء چین کے پہلے مرحلے میں ہانگژو روانہ پہنچ گئے۔ نائب وزیراعظم اسحاق ڈار، وزیرمنصوبہ بندی احسن اقبال، وزیراطلاعات عطا تارڑ، وزیرآئی ٹی شزہ فاطمہ اور معاون خصوصی طارق فاطمی بھی وزیراعظم شہباز شریف کے ہمراہ ہیں۔

تفصیلات کے مطابق وزیراعظم محمد شہباز شریف اپنے دورے کا آغاز صوبہ ژیجیانگ کے شہر ہانگژو سے کر رہے ہیں۔نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ منصوبہ بندی احسن اقبال، وزیرِ اطلاعات و نشریات عطاء اللہ تارڑ، وزیر آئی ٹی شزہ فاطمہ خواجہ اور معاون خصوصی طارق فاطمی بھی وزیراعظم کے ہمراہ ہیں۔

ہانگژو میں ژجیانگ صوبے کے پارٹی سیکریٹری وزیراعظم سے ملاقات کریں گے۔ محمد شہباز شریف سی پیک فیز 2 کے تحت پاکستانی اور چینی کمپنیوں کے مابین تعاون کے فروغ کیلئے منعقدہ بزنس فورم اور معاہدوں و مفاہمتی یادداشتوں کے تبادلے کی تقریب میں شرکت کریں گے۔

علاوہ ازاں چینی کمپنی علی بابا کے ہیڈکوارٹر کا دورہ کرتے ہوئے وزیراعظم تعاون کی مفاہمتی یادداشتوں پر دستخط کی تقریب میں شرکت کریں گے۔

اسی طرح دورے کے دوسرے مرحلے میں وزیرِ اعظم بیجنگ کیلئے روانہ ہونگے۔ بیجنگ میں وزیرِ اعظم محمد شہباز شریف چین کے صدر شی جنپنگ سے ملاقات کریں گے۔ وزیراعظم کی اپنے چینی ہم منصب لی چیانگ سے بھی ملاقات ہوگی۔ ان ملاقاتوں میں سیاسی،معاشی اور تزویراتی شعبوں میں دوطرفہ تعاون کا جائزہ لیا جائے گا۔

اس موقع پر دونوں ملکوں کی قیادت کی خصوصی توجہ پاکستان۔چین اقتصادی راہداری کی ترقی، تجارت، سرمایہ کاری، صنعتی تعاون، زرعی جدیدکاری، انفارمیشن ٹیکنالوجی، سائنس و ٹیکنالوجی اور عوامی روابط پر مرکوز ہوگی۔ بیجنگ میں قیام کے دوران معروف چینی کمپنیوں کے سربراہان بھی وزیراعظم سے ملاقاتیں کریں گے۔

وزیراعظم محمد شہبازشریف ایک ایسے موقع پر چین کا دورہ کر رہے ہیں جب دونوں ملک اپنے سفارتی تعلقات کی 75 ویں سالگرہ منا رہے ہیں۔ پاک چین سفارتی تعلقات کی 75 ویں سالگرہ کے حوالے سے منعقدہ تقریب میں وزیراعظم کی شرکت اسی سلسلے کی کڑی ہے۔

ماہرین کاکہنا ہے کہ وزیرِ اعظم کا دورہء چین پاکستان چین تعلقات میں نئی جہتوں کا اضافہ کرے گا جس میں بالخصوص سی پیک فیز 2 کے تحت پاکستانی اور چینی کمپنیوں کے مابین تعاون میں اضافہ شامل ہے۔

یہ دورہ پاکستان۔چین سدابہار تعاون پر مبنی تزویراتی شراکت داری کو مزید مضبوط بنانے اور مشترکہ مستقبل کے وژن کو آگے بڑھانے کے حوالے سے انتہائی اہمیت کا حامل ہے۔