لبیک اللھم لبیک!مناسک حج کا باقاعدہ آغاز ہوگیا،عازمین حج منیٰ پہنچ رہے ہیں، وقوفِ عرفہ کل ادا کیا جائے گا

مکہ مکرمہ:آ ج سے مناسکِ حج کا باقاعدہ آغاز ہو گیا۔عازمین حج منیٰ پہنچ رہے ہیں جہاں وہ عبادات اور دعاؤں میں مصروف رہیں گے۔
تفصیلات کے مطابق عازمین پیر کی رات منیٰ میں قیام کریں گے اور  منگل 9 ذی الحج کو حج کے رکن اعظم وقوف عرفہ کے لیے منیٰ سے عرفات روانہ ہو ں گے۔غروبِ آفتاب کے بعد حجاج کرام مزدلفہ روانہ ہوں گے ۔ جہاں وہ کھلے آسمان تلے شب بسر اور رمی کے لیے کنکریاں جمع کریں گے۔

جبلکہ دس ذوالحجہ کو حجاج کرام جمرات میں شیطان کو کنکریاں مارنے کے بعد حلق اور قربانی کریں گے اورطوافِ زیارت کریں گے۔

حکام کے مطابق جمعہ کی دوپہر تک بیرون ملک سے آنے والے حجاج کی تعداد 15 لاکھ 18 ہزار سے تجاوز کر چکی تھی، جن میں سے 14 لاکھ 57 ہزار سے زیادہ فضائی راستے سے پہنچے۔سعودی حکام نے مقدس مقامات پر سایہ دار جگہوں ، مسٹ فین اور طبی سہولیات میں اضافہ کردیا ہے۔

دوسری جانب سعودی محکمہ موسمیات نے خبردار کیا ہےکہ مناسک حج کے دوران ہوا میں نمی کا تناسب 40 فیصد رہے گا اور کھلے علاقوں میں گرد آلود ہوا چلنےکا امکان ہے۔

محکمہ موسمیات کے مطابق مناسک حج کے دوران مکہ مکرمہ میں سخت گرمی کا امکان ہے اور 25 مئی تک درجہ حرارت 47 ڈگری سینٹی گریڈ تک جاسکتا ہے

۔سعودی  حکام نے اپیل کی ہے کہ عازمین حج ہدایات پر عمل کریں اور زیادہ مقدار میں پانی کا استعمال کرکے سخت گرمی میں پانی کی کمی سے بچنےکی کوشش کریں اور رہنما حفاظتی اصولوں پر ہر حال میں عمل کریں۔