پاکستان نے آسٹریلیا کیخلاف ون ڈے سیریز جیت لی

لاہور: پاکستان نے آسٹریلیا کو تیسرے ون ڈے میں 4 وکٹ سے شکست دے دی۔

پاکستان نے 3 میچوں کی سیریز  1-2  سے اپنے نام کرلی، پاکستان نے 158 رنز کا ہدف 42 ویں اوور  میں حاصل کرلیا۔

 پاکستانی بولروں نے شاندار بولنگ کر کے آسٹریلوی ٹیم کو 157 رنز پر پویلین بھیج دیا، آسٹریلیا نے تیسرے اور آخری میچ میں پہلے بیٹنگ کرتے ہوئے پاکستان کو جیت کیلئے 158 رنز کا ہدف دیا تھا، آسٹریلوی ٹیم کےکپتان جوش انگلس نے 65 رنز کی اننگز کھیلی، لیبوشین اور ایلکس کیری نے 19، 19 رنز اسکور کیے، ایڈم زمپا 10 رنز بناکر آؤٹ ہوگئے۔

پاکستان کی جانب سے شاہین آفریدی نے 3، ابرار  احمد اور شاداب خان نے 2،2 کھلاڑیوں کو پویلین کی راہ دکھائی،  ایک کھلاڑی کو حارث رؤف نے آؤٹ کیا۔

 ہدف کے تعاقب میں پاکستانی ٹیم بھی مشکلات کا شکار رہی ، بابر اعظم نے 40 رنز کی محتاط اننگز کھیلی، معاذ صداقت نے 27 رنز بنائے،  آخر میں عبدالصمد اور شاداب خان نے ساتویں وکٹ کے لیے 49 رنز کی شراکت بنا کر میچ جتوا دیا۔

آسٹریلیا نے تیسرے ون ڈے میں پاکستان کے خلاف ٹاس جیت کر بیٹنگ کا فیصلہ کرلیا۔

لاہور میں بارش اور آندھی کے باعث ٹاس 15 منٹ کی تاخیر سے 4 بج کر 15 منٹ پر ہوا جبکہ میچ کا آغاز 4 بج کر 45 منٹ پر ہوگا۔

پاکستانی ٹیم کے کپتان شاہین آفریدی نے میڈیا سے گفتگو کرتے ہوئےکہا کہ پاکستان ٹیم میں کوئی تبدیلی نہیں کی گئی، آسٹریلیا کے خلاف مزید اچھی بولنگ کرنا پڑے گی،  اسپنرز سے اچھی مدد ملے گی،  بارش سے زیادہ اثر نہیں پڑا ہو گا۔

آج کے میچ کیلئے پاکستان ٹیم میں کوئی تبدیلی نہیں کی گئی جبکہ آسٹریلوی ٹیم میں ایک تبدیلی ہوئی ہے، تنویر سنگھا کی جگہ کوپر کونولی کو ٹیم میں شامل کیا گیا ہے۔

پاکستان اور آسٹریلیا کے درمیان ون ڈے سیریز میں پانچ مرتبہ ایسا موقع آیا ہے جب سیریز کا آخری میچ فیصلہ کن بن گیا ہو اور ایسی صورتحال میں چار مرتبہ پاکستان فاتح رہا ہے۔

خیال رہے کہ تین ایک روزہ میچوں کی سیریز 1-1  سے برابر ہے،  پہلے میچ میں پاکستان نے آسٹریلیا کو 5 وکٹ سے شکست دی تھی جبکہ دوسرے میچ میں آسٹریلیا نے پاکستان کو 42 رنز سے شکست دی تھی۔