خیبرپختونخوا :سیکیورٹی فورسز کی الگ الگ کارروائیاں، 4 خوارج جہنم واصل

راولپنڈی: پاک فوج کے شعبہ تعلقات عامہ(آئی ایس پی آر) کے مطابق خیبر پختونخوا میں سکیورٹی فورسز کی 2 الگ الگ کارروائیوں میں بھارتی حمایت یافتہ فتنہ الخوارج سے تعلق رکھنے والے 4 خوارج ہلاک کر دیئے گئے۔

ترجمان آئی ایس پی آر کے مطابق ڈیرہ اسماعیل خان میں خوارج کی موجودگی کی اطلاع پر کارروائی کی گئی، شدید فائرنگ کے تبادلے کے بعد بھارتی حمایت یافتہ 2 خوارج جہنم واصل ہو گئے۔

ترجمان پاک فوج نے مزید بتایا کہ ضلع مہمند میں ایک اور آپریشن میں مزید 2 خوارج ہلاک کر دیئے گئے، ہلاک ہونے والے خوارج کے قبضے سے اسلحہ اور گولہ بارود برآمد ہوا۔

ترجمان کے مطابق ہلاک ہونے والے دہشت گرد عناصر علاقے میں دہشت گردی کی متعدد کارروائیوں میں سرگرم رہے تھے، علاقے میں موجود کسی بھی دوسرے خارجی کے خاتمے کے لیے کلیئرنس آپریشن جاری ہے۔

پاک فوج کے شعبہ تعلقات عامہ کے مطابق سیکیورٹی فورسز اور پاکستان کے قانون نافذ کرنے والے ادارے وفاقی ایپکس کمیٹی برائے نیشنل ایکشن پلان کے منظور کردہ وژن  عزمِ استحکام  کے تحت دہشت گردی کے خلاف اپنی مسلسل مہم پوری قوت کے ساتھ جاری رکھیں گے۔

آئی ایس پی آر کے مطابق ملک سے بیرونی سرپرستی اور حمایت یافتہ دہشت گردی کا مکمل خاتمہ کیا جائے گا۔