وزیراعظم کی گلگت بلتستان میں پرامن اور شفاف انتخابات پر عوام کو مبارکباد

اسلام آباد: وزیراعظم محمد شہباز شریف نے گلگت بلتستان میں شفاف، پرامن اور سیاسی سرگرمیوں سے بھرپور انتخابات کے انعقاد پر گلگت بلتستان کے عوام کو مبارکباد پیش کی ہے۔

تفصیلات کے مطابق وزیراعظم نے اپنے بیان میں کہا کہ پاکستان پیپلز پارٹی گلگت بلتستان کے انتخابات میں اکثریتی سیاسی جماعت کے طور پر سامنے آئی ہے، جس پر وہ مبارکباد کی مستحق ہے۔ انہوں نے صدر مملکت آصف علی زرداری اور بلاول بھٹو زرداری کو بھی مبارکباد پیش کی۔

اپنے بیان میں وزیراعظم شہباز شریف نے پاکستان مسلم لیگ (ن) کے کامیاب امیدواروں کو مبارکباد دیتے ہوئے کہا کہ انہوں نے اچھا مقابلہ کیا۔ انہوں نے کہا کہ مسلم لیگ (ن) کی ٹیم نے بھرپور محنت کی، جس پر وہ شاباش کی مستحق ہے۔

علاوہ ازاں اپنے بیان میں انہوں نے گلگت بلتستان کے تمام کامیاب امیدواروں کو بھی مبارکباد پیش کی اور سیاسی سرگرمیوں میں بھرپور شرکت پر عوام کو خصوصی تحسین کا مستحق قرار دیا۔

وزیراعظم نے کہا کہ پرامن اور شفاف انتخابات اور سیاسی سرگرمیاں جمہوریت کا حسن ہیں۔ انہوں نے الیکشن کمیشن کی جانب سے شفاف اور غیر جانبدار انتخابات کے انعقاد کو قابلِ ستائش قرار دیا۔

انہوں نے مزید کہا کہ پولیس اور دیگر قانون نافذ کرنے والے اداروں نے پرامن انتخابات کے انعقاد میں بھرپور کردار ادا کیا، جس پر وہ شاباش کے مستحق ہیں۔