جو کچھ  ہو رہا ہے سب امریکا کی پلاننگ ہے،واشنگٹن اسرائیل کی پشت پناہی بند کرے، اسماعیل بقائی

تہران: ایران کی وازات خارجہ کے ترجمان اسماعیل بقائی نے کہا ہے کہ خطے میں جو کچھ بھی ہو رہا ہے یہ سب امریکہ کی پلاننگ ہے، مذاکرات کی کا میابی کیلئے واشنگٹن کو اسرائیل کی پشت پناہی بند کر نا ہو گی۔

تفصیلات کے مطابق ایرانی وزارتِ خارجہ کے ترجمان اسماعیل بقائی نے ہفتہ وار پریس بریفنگ کے دوران کہا کہ لبنان جنگ بندی معاہدے کا لازمی حصہ ہے، تاہم امریکا اس معاہدے کی حالیہ خلاف ورزیوں کا ذمہ دار ہے کیونکہ اسرائیلی اقدامات کو امریکی پالیسیوں سے الگ نہیں دیکھا جا سکتا۔

اسماعیل بقائی نے دوٹوک الفاظ میں کہا کہ جو کچھ ہو رہا ہے وہ سب امریکا کی پلاننگ ہے اور واشنگٹن خطے میں دوبارہ کشیدگی بڑھانے کا باعث بن رہا ہے۔

پریس کانفرنس میںترجما ن نے لبنان میں جنگ بندی کی خلاف ورزیوں پر سخت ردعمل دیتے ہوئے اس کا براہِ راست ذمہ دار امریکا کو قرار دیا ہے۔انہوں نے واضح کیا کہ اسرائیل مذاکرات کا احترام نہیں کرتا اور سفارتی عمل کی مسلسل خلاف ورزی کر رہا ہے، جس سے امریکا کے ساتھ مستقبل کے ممکنہ سفارتی عمل کو شدید نقصان پہنچ سکتا ہے۔

دوران پریس کانفرنس ترجمان نے مزید کہا کہ ایران جنگ کا خاتمہ چاہتا ہے لیکن اسرائیل سفارتی اصولوں اور معاہدوں کو پامال کر رہا ہے، تاہم کسی کو بھی معاہدے کی کسی شق کو متاثر کرنے کی اجازت نہیں دی جائے گی۔

علاوہ ازا ں عالمی ایٹمی توانائی ایجنسی (IAEA) کے حوالے سے بات کرتے ہوئے اسماعیل بقائی نے کہا کہ ادارے کے سربراہ خطے کی حقیقی صورتحال کو نظر انداز کر رہے ہیں، اگر عالمی ادارہ سیاسی بیانیہ اختیار کرے گا تو اس کی ساکھ متاثر ہوگی۔

بریفنگ کے دوران انہوں نے ان خبروں کی بھی سختی سے تردید کی کہ ایران نے سعودی عرب پر حملہ کیا ہے، ان کا کہنا تھا کہ ایرانی مسلح افواج نے سعودی عرب پر کسی قسم کا کوئی حملہ نہیں کیا۔انہوں نے اعادہ کیا کہ ایران اپنی ملکی سلامتی اور مفادات کے دفاع کے لیے ہمہ وقت تیار ہے۔