مری: سیاحوں کی وین میں ٹریفک حادثے کے بعد آگ بھڑک اٹھی،10 افراد جاں بحق ،متعدد زخمی

مری: پنجاب کے سیاحتی مقام مری ایکسپریس وے پرایک انتہاائی افسوسناک ٹریفک حادثہ پیش آیا ہے، جس کے نتیجے میں 10افراد جاں بحق ہو گئے۔

تفصیلات کے مطابق ٹریفک حادثہ مری کے علاقے ’کھجٹ‘ کے مقام پر اچانک سیاحوں کی وین الٹ گئی اور وین میں آگ بھڑک اٹھی۔

حادثے میں جاں بحق ہونے والوں کی تعداد 10 ہوگئی ہے جبکہ 13 افراد کے شدید زخمی ہونے کی اطلاعات ہیں۔ زخمیوں کو پمزاسلام آباد منتقل کیاجارہا ہے،حادثے کے بعد ریسکیو ٹیمیں اور متعلقہ حکام نے فوری طور پر امدادی کارروائیاں شروع کر دیں۔

دوسری جانب ترجمان موٹروے پولیس کا کہنا ہے کہ مری ایکسپریس وے پر پیش آنے والے اس حادثے میں آگ لگنے کے باعث جانی نقصان ہوا ہے۔

ترجمان کا کہنا ہے کہ ریسکیو ٹیمیں موقع پر موجود ہیں اور امدادی سرگرمیاں بھرپور انداز میں جاری ہیں۔ متاثرہ افراد کو محفوظ مقام پر منتقل کرنے اور صورتحال پر قابو پانے کے لیے متعلقہ ادارے مشترکہ طور پر کام کر رہے ہیں۔

حکام کے مطابق واقعے کی وجوہات کا تعین کرنے کے لیے تحقیقات کا آغاز کر دیا گیا ہے، جبکہ مزید تفصیلات سامنے آنے پر آگاہ کیا جائے گا۔