فیلڈ مارشل نے جنگ کے شعلے ماند کرنے اور امن کیلئے دن رات کاوشیں کیں،شہبازشریف

اسلا م آباد: وزیراعظم شہباز شریف نے کہا ہے کہ، فیلڈ مارشل نے ایران امریکہ مذاکرات اورجنگ کے شعلے ماند کرنے اور امن کیلئے دن رات کاوشیں کیں۔

تفصیلات کے مطابق قومی اسمبلی اجلاس سے اظہار خیال کرتے ہوئےانہوں نے کہا کہ مذاکراتی عمل کی کامیابی پر عظیم دوست صدرشی جن پنگ کا بھی شکریہ ادا کرتا ہوں، چین کے صدر نے امن معاہدے کیلئے مذاکرات کو آگے بڑھانے میں تعاون کیا۔

اس موقع پر وزیراعظم نے کہا کہ یہ عظیم لمحہ وطن عزیز کے ہر شہری کیلئے باعثِ فخر اور یادگار ہے، آج دنیا نے دیکھا کہ امن کی اس کاوش کو عظیم فتح نصیب ہوئی۔

ان کا کہنا تھا کہ فیلڈ مارشل عاصم منیر کا ذکر کیے بغیر میری تقریر ادھوری رہے گی، فیلڈ مارشل نے جنگ کے شعلے ماند کرنے اور امن کیلئے دن رات کاوشیں کیں، میں گواہ ہوں کہ اس عظیم سپوت نے ہمت نہیں ہاری، اگر خلوص اور دانشمندی کا یہ سفر جاری نہ رہتا تو شاید امن کا خواب بکھر جاتا، مجھ سمیت پوری قوم انہیں خراج تحسین پیش کرتی ہے۔

وزیراعظم نے ایران کے سفیر ڈاکٹر رضا امیری مقدم کو قومی اسمبلی میں خوش آمدید کہتے ہوئے کہا کہ یہ عظیم لمحہ وطن عزیز کے ہر شہری کیلئے باعث فخر ہے، خلوص، استقامت اور دانشمندی سے اس مشکل مرحلے کا پار کیا۔

انہوں نے مزید کہا کہ نائب وزیر اعظم کی امن عمل کیلئے غیر معمولی کوششیں بھی قابل ستائش ہیں، معیشت پر دباؤ کے باوجود قوم نے ملک پاکستان کا ساتھ دیا، وزیر داخلہ محسن نقوی نے بھی امن عمل میں اہم امور انجام دیے۔

ان کا کہنا تھا کہ اس جنگ کے تباہ کن اثرات سے پوری دنیا اور اس کی معیشت لرز گئی اور پاکستان کی معیشت پر بھی بے پناہ اثر آیا جو اب تک جاری ہے، میں عوام کو یقین دلاتا ہوں کہ حکومت اس امن معاہدے کے نتیجے میں عالمی معاشی استحکام کے ثمرات ہر پاکستانی کو پہنچائے گی۔

انہوں نے پاکستان کے چاروں صوبوں، آزاد کشمیر اور گلگت بلتستان کے عوام کو مبارکباد دیتے ہوئے کہا کہ یہ کامیابی پوری قوم کی کامیابی ہے اور آج دنیا نے دیکھ لیا ہے کہ پاکستان امن، استحکام اور مکالمے کا علمبردار ملک ہے۔

انہوں نے مزید کہا کہ پاکستانی عوام نے بھی مشکل صورتحال میں حکومت کا بھرپور ساتھ دیا، یقین دلاتا ہوں کہ اس امن معاہدے کے نتیجے میں عالمی معاشی استحکام آئے گا، ہر بندے کی دہلیز تک ریلیف پہنچائیں گے۔