روس کا ٹی یو-22 بمبار طیارہ ٹریننگ پرواز کے دوران گر کر تباہ،وزارت دفاع کی تصدیق 

ماسکو:روس کا ٹی یو-22 بمبار طیارہ ایک تربیتی پرواز کے دوران گر کر تباہ ہو گیا۔

غیر ملکی میڈیا رپورٹس کے مطابق طیارہ روسی علاقے میں حادثے کا شکار ہوا، روسی وزارت دفاع نے واقعے کی تصدیق کرتے ہوئے بتایا کہ بمبار طیارہ معمول کی ٹریننگ فلائٹ پر تھا جب یہ حادثہ پیش آیا۔

وزارت دفاع کے مطابق حادثے کے فوری بعد امدادی اور ریسکیو ٹیموں کو جائے وقوعہ پر روانہ کیا گیا، طیارے میں سوار عملے کے تمام ارکان محفوظ ہیں اور انہیں بروقت بحفاظت نکال لیا گیا۔

ابتدائی اطلاعات کے مطابق حادثے کی وجوہات جاننے کے لیے تحقیقات کا آغاز کر دیا گیا ہے، جبکہ تکنیکی خرابی سمیت مختلف پہلوؤں کا جائزہ لیا جا رہا ہے۔

خیال رہے کہ ٹی یو-22 روسی فضائیہ کے اہم طویل فاصلے تک مار کرنے والے بمبار طیاروں میں شمار ہوتا ہے اور مختلف دفاعی مشنز میں استعمال کیا جاتا ہے، حادثے کے بعد روسی حکام نے مزید تفصیلات جلد جاری کرنے کا عندیہ دیا ہے۔