امریکا نہ ہوتا تواسرائیل کا وجود ہی نہ ہوتا ، حزب اللہ سے نمٹنے کی ذمہ داری شام کو سونپنی چاہئے،ٹرمپ

پیرس: امریکی صدر ڈونلڈ ٹرمپ نے کہا ہے کہ اگر امریکہ نہ ہوتا تو اسرائیل کا وجود ہی  نہ ہوتا، انہوںنے کہا کہ لبنانی مزاحمتی تنظیم حزب اللہ سے نمٹنے کی ذمہ داری شام کو سونپنی چاہیے۔

تفصیلات کے مطابق فرانس میں جی سیون اجلاس کے موقع پر امریکی صدر ٹرمپ نے قطر کے امیر سے ملاقات کے بعد میڈیا سے گفتگو میں ٹرمپ کا کہنا تھا کہ امریکا نہ ہوتا تواسرائیل کا وجود ہی نہ ہوتا، ایران جوہری ہتھیار بنانے سے صرف 2 ہفتے کی دوری پر تھا۔

صحافیوں سے گفتگو میں انہوںنے کہا کہ ایران کے ساتھ معاہدہ منصفانہ ہے، معاہدہ کامیاب ہونا چاہیے، توقع ہے ایران ڈیل کا دوسرا مرحلہ آسان ہو گا۔

روس یوکرین کے حوالےسے گفتگو کرتے ہوئے صدر ٹرمپ نے کہا کہ ہم نے ایران کے ساتھ معاہدہ کر لیا ہے، روس کو چاہیے کہ وہ بھی یوکرین کے ساتھ معاہدہ کر لے۔

ان کا مزید کہنا تھا کہ یہ معاہدہ ایٹمی ہتھیاروں کے سامنے دیوار ہے، ایران کے پاس اب معقول قیادت ہے، اس کے ساتھ معاہدہ برقرار رہ سکتا ہے۔ اگر ایران جوہری ہتھیار حاصل کرنے کی کوشش کرے گا تو جہنم ڈھا دیں گے۔

ٹرمپ نے امریکا کے ایران میں سرمایہ کاری کرنے کی تردید کرتے ہوئے کہا کہ امریکا ایران میں کوئی پیسہ نہیں لگائے گا۔

ان کا مزید کہنا تھا کہ لبنان کی جنگ کو نسبتاً معمولی تنازع سمجھتا ہوں، نیتن یاہو سے اچھے تعلقات ہیں، اسرائیل کو تجویز دی ہے کہ حزب اللّٰہ سے نمٹنے کی ذمہ داری شام کو سونپی جائے، اب نیتن یاہو کو لبنان کے معاملے میں زیادہ ذمہ داری کا مظاہرہ کرنا ہو گا۔