وفاقی حکومت گلگت بلتستان کیلئے 100 میگاواٹ شمسی بجلی منصوبے کے اخراجات برداشت کرے گی،وزیراعظم

اسلام آباد:وزیراعظم محمد شہباز شریف نے کہا ہے کہ وفاقی حکومت گلگت بلتستان کے عوام کے لئے 100 میگا واٹ شمسی بجلی کی فراہمی منصوبہ کے تمام تر اخراجات اٹھائے گی۔

تفصیلات کے مطابق اسلام آباد میں منصوبے کے حوالے سے اجلاس کی صدارت کرتے ہوئے وزیراعظم نے منصوبے پر کام کی رفتار تیز اور جلد از جلد مکمل کرنے کے علاوہ تمام مراحل میں شفافیت یقینی بنانے کے لئے غیر جانبدار تھرڈ پارٹی ویلیڈیشن کی ہدایت کی۔

اجلاس میں متعلقہ حکام نے گلگت بلتستان میں وفاقی حکومت کے سولر منصوبے کے حوالے سے بریفنگ دی۔بریفنگ میں بتایا گیا کہ گلگت بلتستان کی سرکاری عمارتوں کے لئے 18 میگا واٹ شمسی توانائی کا منصوبہ ہے ۔

گلگت اور دیامیر ڈویژنز کی سرکاری عمارات کے لئے 18 میگا واٹ کا منصوبہ دسمبر 2026 جبکہ بلتستان ڈویژن کی سرکاری عمارات کی سولرائزیشن کا منصوبہ اکتوبر 2026 تک مکمل ہو گا ۔

دوران اجلاس کو بتایا گیا کہ گلگت، سکردو، چلاس اور خپلو میں گھروں کے لئے 82 میگاواٹ کے شمسی توانائی کا منصوبے پر بھی کام جاری ہے۔

اجلاس میں وفاقی وزراء احسن اقبال ،احد خان چیمہ ، سردار اویس احمد خان لغاری، انجینئر امیر مقام اور متعلقہ اعلیٰ سرکاری افسران نے شرکت کی۔