گلگت بلتستان: پی پی نے حکومت سازی کیلئے پی ٹی آئی اور ایم ڈبلیو ایم سے رابطہ کرلیا

پاکستان پیپلزپارٹی نے گلگت بلتستان میں حکومت سازی کیلئے  مجلس وحدت مسلمین (ایم ڈبلیو ایم) اور پاکستان تحریک انصاف کی قیادت سے رابطے کرلیے۔

ذرائع کے مطابق پیپلزپارٹی وفاق میں موجود اپوزیشن سے مل کرگلگت بلتستان میں حکومت بنانا چاہتی ہے اور اپوزیشن قیادت اگلے24 گھنٹےمیں جی بی میں حکومت سازی پرمشاورت اور فیصلے کرے گی۔

ایم ڈبلیو ایم کا ایک اور پی ٹی آئی کےحمایت یافتہ 2 آزاد امیدوار گلگت بلتستان سے جیتے ہیں اور ذرائع کے مطابق اپوزیشن کے پاس جی بی میں خواتین اورٹیکنوکریٹ کی نشست ملاکر 5 ارکان کے ووٹ ہونگے۔

دوسری جانب گلگت بلتستان اسمبلی کے 24 میں سے 22 حلقوں کے نتائج کے مطابق پاکستان پیپلزپارٹی 10، ن لیگ 5 جبکہ 4آزادامیدوار استحکام پاکستان پارٹی میں شامل ہوجانے کے بعدآئی پی پی کی نشستیں 4، آزادامیدوار 2 اور ایم ڈبلیو ایم ایک نشست لینے میں کامیاب ہوسکی ہے۔

خیال رہے کہ وزیراعظم شہباز شریف نے گلگت بلتستان میں پیپلزپارٹی کو حکومت بنانے کی دعوت دی ہے، ن لیگ نے اپوزیشن میں بیٹھنے کا بھی فیصلہ کیا ہے۔