لاہور:فنکار برادری بھی شہدائے کربلا کے سوگ میں ڈوب گئی

لاہور(عبدالسلام علی): محرم الحرام میں فنکار برادری کی جانب سے بھی مجالس کا انعقاد کیا جا رہا ہے.

شوبز شخصیات بھی امام عالی مقام علیہ سلام اور ان کے جانثار ساتھیوں کو خراج عقیدت پیش کرنے میں کوشاں دکھائی دیتے ہیں محرم الحرام کا چاند نظر آتے ہی محبان اہل بیت کے دل  شہدائے کربلا  کی یاد میں غمگین ہو جاتے ہیں۔ایسے میں شوبز سے وابستہ افراد بھی امام عالی مقام کو نذرانہ عقیدت پیش کرنے میں پیش پیش نظر آتے ہیں۔

فنکار برادری کی جانب سے مجالس اور نذو نیاز کا اہتمام کیا جاتا ہے، فیشن ڈیزائنر ٹمی رائے کی رہائش گاہ پر مجلس عزا کا اہتمام کیا گیا جس میں عزاداروں نے بھرپور شرکت کی، اس موقع  پر سوزو سلام پیش کیا گیا اور کربلا کے معصومین کی عظیم قربانی کو خراج عقیدت پیش کیا گیا.

فلم ڈائریکٹر جرار رضوی کی رہائش گاہ پر نذو نیاز کا اہتمام کیا گیا، جس میں اداکارہ میرا، لیلیٰ ، ہدایتکارہ سنگیتا، ٹمی رائے اور دیگر شریک ہوئے، شہدائے کربلا کو پرسہ پیش کیا گیا۔ 

دوسری جانب ملکہ ترنم نور جہاں کی رہائشگاہ شاہ نور اسٹوڈیو  سے ستتر سالہ  قدیمی و تاریخی جلوس برآمد ہوا، موسیقار بخشی وزیر کی رہائش گاہ اندرون بھاٹی سے  بھی  جلوس برآمد کیا گیا، 

محرم الحرام میں پوری امت مسلمہ غم حسینؑ میں سوگوار دکھائی دیتی ہے۔ ان عظیم ہستیوں کو یاد کیا جاتا ہے جنہوں نے دین اسلام کی سربلندی کے لیے میدان کربلا میں اپنی جانوں کا نذرانہ پیش کیا۔