کوئٹہ سے پشاور جانے والی مسافر کوچ کھائی میں جا گری، 40 افراد جاں بحق، 8 زخمی

کوئٹہ: کوئٹہ سے پشاور جانے والی نیو مہران کوچ جمعہ کے روز بلوچستان اور خیبرپختونخوا کی سرحد پر واقع دانا سر (شیرانی۔ژوب ہائی وے) کے خطرناک پہاڑی مقام پر گہری کھائی میں گر گئی، جس کے نتیجے میں 40 افراد جاں بحق جبکہ 8 مسافر شدید زخمی ہوگئے۔

ابتدائی اطلاعات کے مطابق کوچ کوئٹہ سے 36 مسافروں کو لے کر روانہ ہوئی تھی، تاہم راستے میں ایک خراب ہونے والی دوسری بس کے مسافروں کو بھی اس میں سوار کر لیا گیا، جس کے بعد حادثے کے وقت کوچ میں مجموعی طور پر 48 افراد موجود تھے۔

ابتدائی تحقیقات کے مطابق تیز رفتاری کے دوران خطرناک موڑ کاٹتے ہوئے کوچ کا اسٹیئرنگ فیل ہوگیا، جس کے باعث ڈرائیور گاڑی پر قابو نہ رکھ سکا اور کوچ سیکڑوں فٹ گہری کھائی میں جا گری۔ دشوار گزار پہاڑی علاقہ ہونے کی وجہ سے امدادی کارروائیوں میں شدید مشکلات کا سامنا کرنا پڑا۔

ریسکیو1122،ضلعی اتظامیہ، فرنٹیئر کوراور دیگر امدادی اداروں نے فوری کارروائی کرتے ہوئے زخمیوں اور لاشوں کو کھائی سے نکالا۔ زخمیوں کو ژوب ٹراما سینٹر، ڈسٹرکٹ ہیڈ کوارٹر ہسپتال ژوب اور ڈیرہ اسماعیل خان کے قریبی ہسپتالوں میں منتقل کیا گیا، جبکہ شیرانی اور قریبی اضلاع کے ہسپتالوں میں ایمرجنسی نافذ کر دی گئی۔

ریسکیو حکام کے مطابق جاں بحق اور زخمی ہونے والوں میں مردوں کے علاوہ خواتین اور بچے بھی شامل ہیں۔ زخمی ہونے والے 8 افراد میں سے 3 کی حالت تشویشناک بتائی جا رہی ہے۔

ڈپٹی کمشنر شیرانی ولی خان کاکڑ نے حادثے کی تصدیق کرتے ہوئے بتایا کہ جاں بحق افراد کی شناخت کا عمل جاری ہے۔ انتظامیہ شناختی کارڈز، موبائل فونز اور بس کے مسافروں کے ریکارڈ کی مدد سے لاشوں کی شناخت کر رہی ہے، جبکہ قانونی کارروائی مکمل ہونے کے بعد میتیں سرکاری ایمبولینسوں کے ذریعے آبائی علاقوں کو روانہ کی جائیں گی۔

صدرِ مملکت آصف علی زرداری نے حادثے پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی اور متعلقہ حکام کو زخمیوں کو بہترین طبی سہولیات فراہم کرنے کی ہدایت کی۔

وزیراعلیٰ بلوچستان میر سرفراز بگٹی نے بھی افسوس کا اظہار کرتے ہوئے واقعے کی جامع تحقیقات کا حکم دیا ہے۔ انہوں نے کہا کہ حادثے کی وجوہات کا مکمل تعین کیا جائے گا اور امدادی کارروائیوں کی خود نگرانی کی جا رہی ہے تاکہ متاثرین کو ہر ممکن سہولت فراہم کی جا سکے۔