دُرفشاں سلیم سے شادی کی افواہوں پر رجب بٹ نے بلاآخر اپنی زبان کھول ہی دی

ویب ڈیسک: معروف یوٹیوبر رجب بٹ نے اداکارہ دُرفشاں سلیم سے اپنی مبینہ شادی سے متعلق سوشل میڈیا پر گردش کرنے والی افواہوں پر پہلی بار تفصیلی ردعمل دیتے ہوئے تمام دعوؤں کو بے بنیاد قرار دے دیا۔

ایک حالیہ انٹرویو میں رجب بٹ نے کہا کہ ان کا دُرفشاں سلیم سے کسی بھی نوعیت کا ذاتی تعلق نہیں۔ انہوں نے واضح کیا کہ اداکارہ ان کی سینئر ہیں، اپنے شعبے میں بہترین کام کر رہی ہیں اور وہ ان کا بے حد احترام کرتے ہیں۔ 

رجب بٹ کا کہنا تھا کہ انہیں آج تک معلوم نہیں ہو سکا کہ یہ افواہ کس نے اور کیوں پھیلائی۔ ان کے مطابق نہ انہوں نے ایسی کوئی خبر پھیلائی اور نہ ہی ان لوگوں سے ان کا کوئی تعلق ہے جنہوں نے یہ دعویٰ کیا۔ انہوں نے کہا کہ ایک صبح آنکھ کھلی تو سوشل میڈیا پر یہ خبر ہر جگہ وائرل تھی اور لوگ مسلسل ان سے اسی بارے میں سوالات کر رہے تھے۔ 

یوٹیوبر نے مزید کہا کہ اس بے بنیاد خبر پر انہیں افسوس ہوا کیونکہ اس سے ایک باعزت فنکارہ کا نام بھی غیر ضروری طور پر خبروں کی زینت بنا۔ ان کے مطابق یہی وجہ تھی کہ انہوں نے فوری طور پر وضاحت کرنا ضروری سمجھی تاکہ افواہوں کا خاتمہ ہو سکے۔ 

واضح رہے کہ چند روز قبل سوشل میڈیا پر رجب بٹ اور دُرفشاں سلیم کی مبینہ شادی سے متعلق خبریں تیزی سے وائرل ہوئی تھیں، تاہم بعد ازاں دُرفشاں سلیم کی جانب سے بھی ان افواہوں کی تردید کی گئی تھی، جبکہ سوشل میڈیا صارفین کی بڑی تعداد نے بھی بغیر تصدیق ایسی خبریں پھیلانے کے رجحان پر تنقید کی۔