صمد عارض کے نئے ڈرامہ 'جدائی' کی شوٹنگ مکمل

لاہور: برطانیہ میں مقیم پاکستانی پروڈیوسر صمد عارض کی نئی ڈرامہ سیریل "جدائی" کی شوٹنگ کامیابی سے مکمل ہوگئی۔

ڈرامہ Emberline Studio Ltd کے اشتراک سے تیار کیا گیا ہے، جبکہ اس کی عکس بندی اسلام آباد سمیت ملک کے مختلف خوبصورت مقامات پر کی گئی۔

صمد عارض اس سے قبل بھی متعدد کامیاب پروڈکشنز پیش کر چکے ہیں اور بطور پروڈیوسر اپنی منفرد صلاحیتوں کا لوہا منوا چکے ہیں۔

ڈرامہ "جدائی" کی کاسٹ میں سینئر اداکار جاوید شیخ، نیئر اعجاز، فرحان قریشی، عکاشہ گل سمیت دیگر نامور فنکار شامل ہیں۔

صمد عارض نے ڈراموں کے علاوہ موسیقی کے شعبے میں بھی نمایاں کام کیا ہے۔ انہوں نے معروف گلوکار ملکو، مظہر راہی، واجد علی بغدادی اور حمیرا ارشد کے ساتھ مختلف میوزک پروجیکٹس تیار کیے، جن میں KAB G Productions نے بھی اہم کردار ادا کیا۔

اس موقع پر صمد عارض کا کہنا تھا کہ ان کا مقصد پاکستانی انٹرٹینمنٹ انڈسٹری کو عالمی سطح پر متعارف کرانا اور بین الاقوامی معیار کے ڈرامے، فلمیں اور میوزک پروجیکٹس پیش کرنا ہے۔

انہوں نے امید ظاہر کی کہ "جدائی" اپنی منفرد کہانی، معیاری پروڈکشن اور باصلاحیت فنکاروں کی عمدہ اداکاری کے باعث ناظرین کی بھرپور پذیرائی حاصل کرے گا اور پاکستانی شوبز انڈسٹری میں ایک قابلِ قدر اضافہ ثابت ہوگا۔