مکہ معاہدے پر حملے کا جواب تینوں ممالک طے کریں گے: ڈی جی آئی ایس پی آر

اسلام آباد: ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ مکہ معاہدے میں شامل کسی ایک فریق پر حملے کی صورت میں تینوں ممالک باہمی مشاورت سے لائحہ عمل طے کرکے اس پر عمل کریں گے۔

عرب ٹی وی کو انٹرویو دیتے ہوئے انہوں نے کہا کہ پاکستان کی دفاعی صلاحیتیں خالصتاً دفاعی نوعیت کی ہیں اور ملک کسی اسلحے کی دوڑ میں شامل نہیں۔ انہوں نے کہا کہ پاکستان کے کسی ملک کے خلاف جارحانہ عزائم نہیں، تاہم وہ اپنے دفاع کے ساتھ دشمن کو جواب دینے کی صلاحیت رکھتا ہے۔

ڈی جی آئی ایس پی آر نے کہا کہ مکہ معاہدہ دفاعی نوعیت کا ہے اور اس کا مقصد خطے میں امن و استحکام کو فروغ دینا ہے۔ انہوں نے واضح کیا کہ فوجی کارروائیوں اور سکیورٹی سے متعلق معلومات خفیہ رکھی جاتی ہیں، اس لیے معاہدے کے تحت کارروائی کا طریقہ کار عوامی سطح پر بیان نہیں کیا جا سکتا۔

افغانستان سے متعلق انہوں نے کہا کہ اقوام متحدہ کی رپورٹس میں وہاں درجنوں دہشت گرد تنظیموں کا ذکر ہے۔ پاکستان کا مطالبہ ہے کہ افغان سرزمین اس کے خلاف دہشت گردی کے لیے استعمال نہ ہو۔

انہوں نے مزید کہا کہ پاکستان، سعودی عرب اور ترکیہ کے چین کے ساتھ بھی بہترین اور تاریخی تعلقات ہیں اور مکہ معاہدہ کسی ملک کے خلاف نہیں بلکہ باہمی دفاعی تعاون کا معاہدہ ہے۔