وفاقی حکومت نے تین ماہ کی کفایت شعاری مہم کا اعلان کر دیا

اسلام آباد: وفاقی حکومت نے بڑھتی ہوئی پٹرولیم مصنوعات کی قیمتوں کے پیش نظر ملک میں ایندھن کی بچت اور اخراجات میں کمی کے لیے تین ماہ کی کفایت شعاری مہم کا نوٹیفکیشن جاری کردیا۔

کابینہ ڈویژن کے نوٹیفکیشن کے مطابق دکانیں، مارکیٹس، شاپنگ مالز اور بازار رات 9 بجے، شادی ہالز اور مارکیز رات 10 بجے جبکہ ریسٹورنٹس، کیفے اور فوڈ آؤٹ لیٹس رات 11 بجے بند ہوں گے۔ ٹیک اوے اور ہوم ڈیلیوری سروسز مستثنیٰ ہوں گی۔

شادی کی تقریبات میں صرف ون ڈش کی اجازت ہوگی، جبکہ فارمیسی، اسپتال، کلینکس، میڈیکل لیبارٹریز، پٹرول پمپس، بیکریاں، تندور، دودھ و ڈیری شاپس، الیکٹرک وہیکل چارجنگ اسٹیشنز اور جم اوقات کار کی پابندی سے مستثنیٰ ہوں گے۔

سرکاری گاڑیوں کے لیے تین ماہ تک ایندھن کی فراہمی میں 50 فیصد کمی کی جائے گی، تاہم مسلح افواج، سول آرمڈ فورسز، ضروری خدمات، ایف بی آر کی آپریشنل گاڑیوں اور ترقیاتی منصوبوں کے لیے استعمال ہونے والی گاڑیوں کو استثنیٰ حاصل ہوگا۔

مالی سال 2026-27 کے نان ای آر ای بجٹ میں ماہانہ بنیاد پر پانچ فیصد کمی ہوگی، جبکہ ترقیاتی بجٹ مستثنیٰ رہے گا۔

تمام گاڑیوں اور پائیدار اشیا کی خریداری پر پابندی ہوگی، تاہم آئی ٹی سے متعلق خریداری مستثنیٰ ہوگی۔ تین ماہ تک تمام سرکاری بیرون ملک دورے بھی معطل رہیں گے، جبکہ اسکالرشپس کے تحت سفر مستثنیٰ ہوگا۔

سرکاری اجلاسوں کے لیے ویڈیو کانفرنسنگ کو ترجیح دینے اور سرکاری فنڈز سے سیمینارز، تربیتی پروگرامز اور کانفرنسز پر پابندی کی ہدایت کی گئی ہے۔ صوبائی و علاقائی حکومتوں کو بھی ایسے ہی کفایت شعاری اقدامات اپنانے پر غور کرنے کی ہدایت کی گئی ہے۔