'سوشل میڈیا پر ریاست مخالف ٹرینڈزکو بھارت اور افغانستان سے سپورٹ کیا جارہا ہے '

وفاقی وزیراطلاعات فواد چودھری اور مشیر قومی سلامتی معید یوسف نے مشترکہ   پریس کانفرنس کی۔وزیر اطلاعات   فواد چوہدری نے کہا کہ  پاکستان کے خلاف سوشل میڈیا مہم چلائی گئی، سوشل میڈیا کا2سال کاڈیٹاجمع کیاگیاہے، پی ٹی ایم نے150ٹرینڈز پاکستان کیخلاف چلائے۔

وزیراطلاعات فواد چودھری  نے کہا کہ  شروعات پی ٹی ایم نے کی اور  بھارت  سے حمایت ملی، پاکستان کے خلاف سوشل میڈیا ٹرینڈز کے پیچھے سب سے زیادہ بھارت ہے۔ بلوچستان سے متعلق 14اگست 2020کوایک ٹرینڈ چلایاگیا،افغانستان سے بھی پاکستان کے خلاف ٹرینڈز میں حصہ ڈالاجاتاہے۔

مشیر قومی سلامتی معید یوسف نے کہا کہ افغانستان سے متعلق پاکستان کیخلاف مہم چلائی جارہی ہے،پاکستان کوانفارمیشن وارفیئر کاسامنا ہے جس کو اعدادوشمار سے ثابت کیا، پاکستانی کسی بھی ٹرینڈ کا حصہ بننے سے پہلے ٹرینڈ کی تحقیق کریں، میٹنگ ہوئی ہے پاکستان کے خلاف پروپیگنڈا عالمی سطح پر اٹھائیں گے۔

مشیر برائے قومی سلامتی معید یوسف کا کہنا ہے کہ سوشل میڈیا پر کچھ بھی ہو اس پر یقین نہ کیا جائے، ہمارے سیکیورٹی ادارے اور حکومت متحرک ہے، مہم میں جو بھی ملوث ہیں انہیں بے نقاب کریں گے۔

معید یوسف کا کہنا تھا کہ  افغانستان میں ناکامی کاملبہ پاکستان پرڈالنے کی کوشش کی جارہی ہے، افغانستان میں ناکامی سے خودکوبچانے کی کوشش کررہے ہیں۔