گلوکارہ نازیہ حسن کی 21 ویں برسی پر نیا تنازعہ کھڑا ہوگیا

تفصیلات کے مطابق   معروف گلوکارہ ، کروڑوں دلوں کی دھڑکن نازیہ حسن  کے بھائی زوہیب حسن  اور شوہر اشتیاق بیگ نے ایک بار پھر  ایک دوسرے پر الزامات کی بوچھاڑ کردی ۔  ناذیہ کی 21 ویں برسی کے موقع پر جی این این سے بات کرتے ہوئے  ان کے بھائی ذوہیب حسن نے بہن کے قتل کا الزام اُن کے شوہر پر عائد کرتے ہوئے کہا کہ نازیہ نے لندن میں حلف کے تحت جو بیان ریکارڈ کروایا تھا کہ اس میں نازیہ نے خود لکھوایا تھا  کہ اس کے شوہر نے اسے کچھ کھلایا تھا اوروہ  اس کے ساتھ برا سلوک کرتا تھا ، نازیہ اپنی زندگی میں اپنے ہاتھ سے لکھ چکی تھیں کہ وہ طلاق چاہتی ہیں ۔

دوسری جانب    جی این این سے گفتگو میں نازیہ کے سابق شوہر مرزا اشتیاق بیگ نے اپنے ردعمل میں کہا ہے  کہ وہ الزامات کے جواب میں زوہیب حسن پر ایک ارب روپے ہرجانے کا دعویٰ دائر کرنے جارہے ہیں۔ان کاکہنا تھا کہ نازیہ حسن اور ان کی لندن میں جائیداد ہے جس پر قبضہ کرنے کیلئے  ذوہیب اور ان  کی فیملی  نے یہ سب پلان کیا ہے  ۔

یاد رہے کہ ماضی کی معروف پاپ گلوکارہ نازیہ حسن کی 21ویں برسی  آج 13 اگست کو منائی جا رہی ہے ، نازیہ حسن کینسر جیسے موذی مرض میں مبتلا ہو کر محض 35سال کی عمر میں 13اگست 2000کو لندن کے ایک اسپتال میں  انتقال کر گئیں  تھیں۔